උතුරු හා උතුරු මැද ජනතාවට රුපියල් ලක්ෂය දක්වා ක්ෂුද්‍ර මූල්‍ය ණය

මේ වන විට උතුරු හා උතුරු මැද ජනතාව දැඩිව පීඩාවට පත්ව සිටින ක්ෂුද්‍ර මූල්‍ය ණය බරින් ජනතාව නිදහස් කරගැනීම සදහා වන තීරණ කිහිපයකට කැබිනට් අනුමැතිය හිමිව තිබෙනවා.
ඒ සදහා මේ වන විටත් උතුරු හා උතුරුමැද පළාත්වල දිස්ත්‍රික් ලේකම් කාර්යාල 06 ක් මගින් ක්‍රියාත්මක වන සමූපකාර ග්‍රාමීය බැංකු සහ සකසුරුවම් හා ණය යෝජනා ක්‍රමය තවදුරටත් පුළුල් කිරීමටයි රජය තීරණය කර ඇත්තේ.
රජය නිවේදනය කරන්නේ මේ වන විට උතුරු පළාතට රුපියල් මිලියන 292 ක් සහ උතුරුමැද පළාතට රුපියල් මිලියන 250 ක් වශයෙන් රුපියල් මිලියන 542 ක මුදලක් එම ණය යෝජනා ක්‍රම යටතේ එම ප්‍රදේශවල ජනතාවට ලබාදී අවසන් බවයි.
ඒ අනුව ක්ෂුද්‍ර මූල්‍ය ණය යෝජනා ක්‍රම මගින් ණය මුදල් ලබාගෙන ණයගැතිභාවයට පත්වී සිටින ග්‍රාමීය අඩු ආදායම්ලාභීන් හට සහන සැලසීම සදහා මෙම චක්‍රීය අරමුදල් භාවිතයෙන් අදාල ණය යෝජනා ක්‍රමය තවදුරටත් ක්‍රියාත්මක කරමින් ඔවුන්ට ලබාදෙන උපරිම ණය සීමාව රුපියල් ලක්ෂය දක්වා ඉහළ දැමීමට කැබිනට් අනුමැතිය හිමිව තිබෙනවා.
එමෙන්ම වාර්ෂික පොලී අනුපාතය 9% සිට 6% දක්වා අඩු කිරීමටත් අග්‍රාමාත්‍යවරයා ඉදිරිපත් කළ යෝජනාවට අමාත්‍ය මණ්ඩල අනුමැතිය හිමිව ඇති බවයි රජයේ ප්‍රවෘත්ති දෙපාර්තමේන්තුව නිවේදනය කරන්නේ.