ඓතිහාසික මිහින්තලා පුද බිමෙන් නව නිදහස් අරගලයකට මුලපුරන බව මිහින්තලා රජමහා විහාරාධිපති පූජ්‍ය වලවාහැංගුණවැවේ ධම්මරතන නාහිමිපාණන් පවසනවා.
මිහින්තලා රජමහා විහාරයේදී පසුගිය 28 වැනිදා පැවති ප්‍රවෘත්ති සාකච්ඡාවකදී උන්වහන්සේ මේ බව සඳහන් කළා.
මිහින්තලා රජමහා විහාරාධිපති ධම්මරතන හිමියන් තවදුරටත් ප්‍රකාශ කළේ නිදහස ලැබීමෙන් පසුව මෙරට සියලු ජන කොටස් පීඩාවට පත් කරනු ලැබුවේ මේ දක්වා පැවැති පාදඩ දේශපාලනය වන අතර රටේ ජනතාව වෙනුවෙන් කිසිදු දේශපාලන පක්ෂයක් හෝ නායකයකු පෙනී නොසිටින බැවින් මෙම පියවර ගත් බවයි.
මේ අතර, නිදහස් අරගලය වෙනුවෙන් පවත්වනු ලබන සමුළුවට පෙර ත්‍රෛනිකායික මහනායක හිමිවරුන් බැහැ දැක ආශිර්වාද ලබා ගන්නා අතර එළැඹෙන ඔක්තෝබර් මාසයේ 14 වැනිදා සවස 2.00 ට සිව් කොණේ සිටින භික්ෂු භික්ෂුණී උපාසක උපාසිකාවන් හා ආගම් භේදයකින් තොරව සියලුම ගිහි පිරිසගේ සහභාගිත්වයෙන් එම සමුළුව ඓතිහාසික මිහින්තලා පුදබිමේදී පැවැත්වීමට කටයුතු කරන බව උන්වහන්සේ පැවසුවා.
මිහින්තලා රජමහා විහාරාධිපති හිමියන් මෙහිදී රටේ ක්‍රියාත්මක වන විනයක් නොමැති අසංවර දේශපාලනය අවසන් කිරීමට සියලුම දෙනාටම ඒකරාශී වන ලෙස ඉල්ලීමක්ද සිදු කළා.
මෙම අවස්ථාවට එක්ව සිටි සුරකිමු ශ්‍රී ලංකා සංවිධානයේ කැඳවුම්කරු පූජ්‍ය ආනන්ද සාගර හිමියන් සඳහන් කළේ මිහින්තලා රජමහා විහාරාධිපති හිමියන්ගේ නායකත්වයෙන් ඔක්තෝබර් මාසයේදී මහා සඟ සමුළුවක් පවත්වා රටට අවැසි වැඩ පිළිවෙළ ක්‍රියාත්මක කිරීමට අවශ්‍ය කටයුතු සිදු කරන බවයි.
සමාජ මාධ්‍ය වාරණ පනත වැනි විවිධ පනත් ගෙන එමින් රනිල් වික්‍රමසිංහ මහතා රටේ ප්‍රශ්න වසන් කිරීමට කටයුතු කරන අතර එම වැඩ පිළිවෙළවල වහා හකුළා ගත යුතු බව ආනන්ද සාගර හිමියන් මෙහිදී අවධාරණය කළා.
උන්වහන්සේ තවදුරටත් සඳහන් කළේ රටේ ජාතික ආරක්ෂාව වෙනුවෙන් බුද්ධි අංශ යෙදවීම වෙනුවට රනිල් වික්‍රමසිංහ මහතා සිදු කරනුයේ උද්ඝෝෂණ හා මාධ්‍ය සාකච්ඡා වාරණය කිරීම පමණක් බවයි.
එමෙන්ම, ඉන්දියානු ආක්‍රමණයට විරුද්ධව මෙරට ස්වජාතික ස්වයංපෝෂිත ආර්ථික රටාවක් සහිත වැඩ පිළිවෙළක් ඔක්තෝබර් මාසයේදී ඓතිහාසික මිහින්තලා පුද බිම මැද මළුවේදී ජාතියට ප්‍රකාශ කරන බවද උන්වහන්සේ ප්‍රකාශ කළා.
මෙම සාකච්ඡාව සඳහා සුරකිමු ශ්‍රී ලංකා සංවිධානයේ කැඳවුම්කරු පූජ්‍ය ආනන්ද සාගර, සිංහල රාවය ජාතික සංවිධානයේ සභාපති පූජ්‍ය අක්මීමන දයාරතන, ජාතික සංඝ සම්මේලනයේ සභාපති පූජ්‍ය ලියන්වෙල ශාසන රතන යන හිමිවරුද සහභාගී වී ඇති බව වාර්තා වෙනවා.
