ජනමාධ්‍ය ආයතන කිහිපයක් නිසා මහාචාර්ය නීලිකා මලවිගේ මහත්මියට ඇතිවූ සිත්තැවුල නිසා තමන් පෞද්ගලකවම ඇය අමතා සමාව ඉල්ලා සිටි බව ජනමාධ්‍ය අමාත්‍ය ඩලස් අලහප්පෙරුම මහතා පවසනවා.
පසුගියදා ගේට්වේ ජාත්‍යාන්තර පාසල සංවිධානයක කරන ලද වෙබ් සම්මන්ත්‍රණයකදී මහාචාර්ය නීලිකා මලවිගේ මහත්මිය දැක්වූ අදහස් විකෘති කරමින් ජනමාධ්‍ය ආයතන කිහිපයක පලවූ පුවත් කිහිපයක් සම්බන්ධයෙන් ඉතා සිත් තැවුලෙන් ඇය ෆේස්බුක් සටහනක් තබා තිබුණා.
ඉන් කියැවුණේ එම පුවත්වල සදහන් කිසිදු කරුණක් තමන් එම සම්මන්ත්‍රණයේදී ප්‍රකාශ නොකළ බවයි.
ජනමාධ්‍ය අමාත්‍ය ඩලස් අලහප්පෙරුම මහතා පවසන්නෙ තමන්ද එම වෙබ් සම්මන්ත්‍රණයේ මහාචාර්ය නීලිකා මලවිගේ මහත්මිය අදහස් දැක්වූ සම්පූර්ණ කතාවම පෞද්ගලිකවම ශ්‍රවණය කළ බවත් එය එහිදී පලකළ අදහස් විකෘති කර ඇති බවත්ය.
එබැවින් එම අත්වැරුද්ද වගකීම් සහගත ජනමාධ්‍ය කලාවක් වෙනූවෙන් හොඳ ආරම්භයක් ලෙසට පරිවර්තනය කරගන්නා ලෙස තමන් සියළුම සහෝදර වෘත්තීය සගයන්ගෙන් හෘදයාංගමව ඉල්ලා සිටින බවද නිවේදනය කරනවා.
