ගැබිනි මව්වරුන් ගිවිසුමකට යටත්කර ගිවිසුම ප්‍රකාරව ඔවුන්ගෙන් බිළිඳු දරුවන් ලබාගෙන එම දරුවන් මුදලට විකිණීමේ ජාවාරමක් පවත්වාගෙන ගිය පුද්ගලයෙකු ඊයේ (21) රාත්‍රියේ පොලිස් අත්අඩංගුවට පත්වුණා.
පොලිස් ළමා හා කාන්තා කාර්යාංශය විසින් සිදුකරනු ලැබු දීර්ඝ විමර්ශනයකින් අනතුරුව එම ජාවාරම මෙහෙයවු 47 හැවිරිදි පුද්ගලයා මාතලේ, උකුවෙල ප්‍රදේශයේ දී අත්අඩංගුවට ගත් බව පොලිස් මාධ්‍ය ප්‍රකාශක, නියෝජ්‍ය පොලිස්පති අජිත් රෝහණ මහතා පවසනවා.
ෆේස් බුක් සමාජ මාධ්‍ය හරහා ප්‍රචාරක කටයුතු සිදුකරමින් CSC Nation Lanka නමින් අදාල ආයතනය පවත්වාගෙන ගොස් තිබෙනවා.
විවිධ අතවරයන්ට පත්වු කිසිදු පිළිසරණක් නොමැති කාන්තාවන් මගින් ඔවුන්ගේ ඉපදීමට සිටින දරුවන් සදහා ඔහු ගිවිසුම් සකසා දරුවන් ලබාගැනීමේ ජාවාරමක කලක පටන් මොහු නියැලී තිබෙනවා.
මෙම ජාවාරම විදෙස් රටවලදී හදුන්වන්නේ “බේබි ෆාම්“ යනුවෙනි.
අදාල විමර්ශනවලින් මෙම පුද්ගලයා සමග කටයුතු කළ ගැබිනි කාන්තාවන් 12 දෙනෙක්ද සොයාගෙන තිබෙනවා.
මොහු මේ වන විට එවැනි කුඩා බිළිදු දරුවන් 30 දෙනෙකු පමණ විකුණාදමා ඇති බවයි පොලීසිය සදහන් කරන්නේ.
මෙම පුද්ගලයා හට විවිධ දේශපාලන බලවතුන්ගේ මෙන්ම පූජ්‍ය පක්ෂයේද සහය ලැබී තිබෙනවා.
ඔහුගේ අසාමාන්‍ය දරු සෙනෙහද දැක්වෙන වීඩියෝ පට වරින් වර ෆේස්බුක් සමාජ මාධ්‍ය වෙත නිකුත් කර තිබූ අතර ඒවා විවේචනය කරමින් මෙහි සැඟවුණු යම් අරමුණක් ඇති බවට ප්‍රකාශ කල පුද්ගලයන් හට බොහෝ පිරිස් දැඩි ලෙස විරෝධය පලකර තිබුණා.
