පාර්ලිමේන්තු මන්ත්‍රීවරුන් 120කට වැඩි පිරිසක් ව්ශ්වාසභංගයක දී සහාය දැක්වීමට සිටින බව තමා ඉතාම විශ්වාසයෙන් ප්‍රකාශ කරන බව පිවිතුරු හෙළ උරුමයේ නායක, හිටපු අමාත්‍ය උදය ගම්මන්පිල මහතා පවසනවා.
ඒ, සිය පක්ෂ කාර්යාලයේ අද (25) පෙරවරුවේ පැවති මාධ්‍ය හමුවකට එක්වෙමින්.
වත්මන් ආණ්ඩුව ඉවත්විය යුතුයි යන ස්ථාවරයේ ඔවුන් සිටින බවයි හිටපු අමාත්‍යවරයා පවසන්නේ.
වැඩිදුරටත් අදහස් දැක්වු ගම්මන්පිල මහතා,
“113 හදන කල් පොඩ්ඩක් ඉන්න කියලා අපි සජබ යෙන් ඉල්ලීමක් කළා. ඔන්න දැන්නම් 113 වෙනුවට 120ක්ම හැදිලා තියෙනවා. ඉතිරි 39ය 65ට එකතු කරාම දැන් 104යි. ඊට පස්සේ අන්තර්කාලීන සර්ව පාක්ෂික ආණ්ඩුවක් පිහිටුවීම සඳහා වර්තමාන ආණ්ඩුව ඉල්ලා අස්විය යුතු බවට පොහොට්ටුවේ මන්ත්‍රීවරු දසදෙනෙක් ලිඛිත ප්‍රකාශයක් සිදුකළා. 104යි 10යි දැන් 114යි. 20 වන සංශෝධනයේ දී සිට ආණ්ඩුවට සහාය පළ කරමින් සිටි විපක්ෂයෙන් මුස්ලිම් මන්ත්‍රීවරු තුන්දෙනෙක් ආණ්ඩුවට ලබාදෙන සහාය ඉවත්කර ගෙන තමන්ගේ පක්ෂවලට යළි ගොණු වුණා. දැන් 114යි තුනයි 117යි.
ඒ වගේම, නාලක ගොඩහේවා ඇමතිතුමත් ඩලස් අලහප්පෙරුම හිටපු ඇමතිතුමත් කෝප් සභාපති චරිත හේරත් මන්ත්‍රීවරයාත් තමන් අන්තර්කාලීන ආණ්ඩුවකට ඉඩ සලසමින් තමන් වහාම ඉවත්විය යුතු බවට ප්‍රසිද්ධ ප්‍රකාශ නිකුත් කළා. ඒ තුනත් එකතු කළාම දැන් 120යි. ඒ කියන්නේ වර්තමාන ආණ්ඩුව ඉවත්විය යුතුයි කියන මතයේ දැන් පාර්ලිමේන්තුවේ මන්ත්‍රීවරු 120ක්ම සිටිනවා. ඒ වගේම දැනට තමන්ගේ මතය ප්‍රසිද්ධ නොකළ පොහොට්ටුවේ මන්ත්‍රීවරු විශාල පිරිසක් විශ්වාසභංගයක දී සහාය දැක්වීමට සිටින බව මම ඉතාම විශ්වාසයෙන් ප්‍රකාශ කරනවා.”
