ඉන්දීය ණය ආධාර යටතේ ඉන්ධන මිලදීගැනීම සඳහා මෙරටට ලැබෙන ඇමෙරිකානු ඩොලර් කෝටි 50 න්, ඩොලර් කෝටි 29 ක් වටිනා ඉන්ධන මේ වන විටත් ලබාගෙන ඇතැයි ලංකා ඛනිජ තෙල් නීතිගත සංස්ථවේ සභාපති සුමිත් විජේසිංහ මහතා පවසනවා.
ඒ, ජනාධිපති මාධ්‍ය කේන්ද්‍රයේදී ඊයේ (08) පැවති මාධ්‍ය හමුවක් අමතමින්.
එම ණය ආධාර යටතේ වසරක කාලයක් තුළ ඉන්ධන ලබාගැනීමට හැකි බවත්, එම ආධාර යෝජනා ක්‍රමය තවදුරටත් දීර්ඝ කරගැනීමට සාකච්ඡා කරමින් සිටින බවයි සභාපතිවරයා පවසන්නේ.
ඉන්දීය ණය ආධාර ක්‍රමයට අමතරව වෙනත් සැපයුම්කරුවන් සමඟ ද ණය ගිවිසුම් අත්සන් කර තිබෙන බව පැවසූ සභාපතිවරයා මෙම ණය යෝජනා ක්‍රමය අවසන් වූ පසුව ද එම සැපයුම්කරුවන් හරහා ඉන්ධන ලබාගත හැකි බවත් පවසනවා.
අප්‍රේල් මාසයේ දී මෙරට පරිභෝජනය සඳහා ඩීසල් මෙට්‍රික් ටොන් 2,10,000ක් අවශ්‍ය වේ යැයි අනුමාන කර ඉන් මෙට්‍රික් ටොන් 2,65,000ක් සහ පෙට්‍රල් මෙට්‍රික් ටොන් 1,10,000ක් අවශ්‍යයැයි සිතා 1,54,000ක් ආනයනය කිරීමට සැලසුම් කර ඇතැයි ද දැනට ගොඩබාමින් ඇති නෞකාවේ ඇති ඩීසල් ප්‍රමාණයට අමතරව, ඉන්දියානු ණය යෝජනා ක්‍රමය හා දීර්ඝකාලීන සැපයුම් ගිවිසුම් අනුව මෙම මස 11, 12 දිනවල ඩීසල් මෙට්‍රික් ටොන් 30,000, 14, 15 දිනවල මෙට්‍රික් ටොන් 40,000 ක් 21, 22 දිනවල මෙට්‍රික් ටොන් 37,300ක් සහ 22,23 දිනවල තව මෙට්‍රික් ටොන් 40,000ක් ආනයනයට කටයුතු සලසා ඇති බව ද සුපර් ඩීසල් මෙට්‍රික් ටොන් 10,000ක් ද ඒ අතර වන බව ද හෙතෙම සඳහන් කරනවා.
මේ හරහා ඇති ආරක්‍ෂිත ඩීසල් තොගය ඉහළ නැංවීමට බලාපොරොත්තු වන බව ද සභාපතිවරයා පවසා සිටිනවා.
