යුක්‍රේනයේ සිට තවත් සංචාරකයින් පිරිසක් අද (04) පස්වරුවේ මත්තල ගුවන් තොටුපොළින් දිවයිනට පැමිණ තිබෙනවා.
SkyUp ගුවන් සේවයට අයත් ගුවන් යානයකින් පැමිණි මෙම පිරිසට සංචාරකයින් 97 දෙනෙකු අයත්.
මීට අමතරව පසුගිය 28 වැනිදා මෙරටට පැමිණි යුක්‍රේන සංචාරක කණ්ඩායමෙන් 21 දෙනෙකු අද මෙරටින් පිටත්ව ගොස් තිබෙනවා.
අද පැමිණි කණ්ඩායම මෙරටට පැමිණි 4 වැනි යුක්‍රේන සංචාරක කණ්ඩායමයි.
මිට පෙර අවස්ථා තුනකදී යුක්‍රේන සංචාරකයින් දිවයිනට පැමිණියද ඔවුන් සම්බන්දයෙන් මේ වන විට ආන්දෝලනාත්මක තත්ත්වයක් ඇතිව තිබෙනවා.
මෙරටට පැමිණ සිටින යුක්‍රේන ජාතික සංචාරකයින් පිරිසක් අද (04) දින පොළොන්නරුව සහ සීගිරිය ප්‍රදේශවල සංචාරය කිරීමට නියමිතව තිබුණද මධ්‍යම සංස්කෘතික අරමුදල එම සංචාර අවලංගු කර තිබෙනවා.
යුක්‍රේන ජාතික සංචාරකයන් පසුගිය දා යාල ජාතික වනෝද්‍යානයේ සංචාරය කිරීමෙන් අනතුරුව ඔවුන් එම සංචාරය රැගෙන ගිය සෆාරි ජීප් රථ රියදුරන් 28 දෙනෙකු දින 14 ක නිරෝධායනයට යොමු කෙරුණා.
එමෙන්ම දිවයිනට පැමිණ සිටින යුක්‍රේන ජාතික සංචාරකයින් අතරින් 5 දෙනෙකු කොවිඩ් ආසාදිතයින් බවට මේ වන විට හදුනාගෙන තිබෙනවා.
මේ අතර විදේශිකයින් හරහා කොවිඩ් 19 වෛරසයේ විවිධ ප්‍රභේද රට තුළට ඇතුළුවීමේ අවදානමක් පවතින බැවින් විදේශීය සංචාරකයින් සම්බන්ධයෙන් සකසා ඇති සෞඛ්‍ය මාර්ගෝපදේශ නිසි පරිදි ක්‍රියාත්මක කළයුතු බව වසංගත රෝග විද්‍යා අංශය පවසනවා.
වසංගත රෝග විද්‍යා අංශයේ ප්‍රධානී විශේෂඥ වෛද්‍ය සුදත් සමරවීර මහතා පවසන්නේ අදාල කරුණු අකුරටම පිළිපැදීම ඉතා වැදගත්වන බවයි.
වැඩිදුර කියවන්න
