විදුලි බල මණ්ඩලය පාඩු ලබන්නේ පාලකයන්ගේ වැරදි ප්රතිපත්ති තීරණ නිසා බවත් ඒ පව් වලට දැන් රටේ සාමාන්ය දුප්පත් ජනතාව වග උත්තරකරුවන් වී ඇති බවත් ජාතික ජන බලවේගයේ ගම්පහ දිස්ත්රික් මන්ත්රී විජිත හේරත් පවසනවා.
ඒ, අද (29) දින පාර්ලිමේන්තුවේදී විදුලි බිල වැඩි කිරීම පිළිබඳ පාර්ලිමේන්තු කල් තැබීමේ විවාදය අමතමින්.
පාලකයන්ගේ වැරදි වලට ජනතාවට වග කියන්න නොහැකි බව කී විජිත හේරත් මහතා දුප්පත් ජනතාව දුක් විඳිද්දී වැරදි තීන්දු ගත් පාලකයන් නිදැල්ලේ සිටින බව පවසනවා.
වැරදි ප්රතිපත්ති හා දේශපාලනඥයන්ගේ විවිධ ක්රියාමාර්ග වල ප්රතිඵල ලෙස විදුලිය පමණක් නොව ගෑස් ,ඉන්ධන ආදී සියල්ලේ මිල වැඩි වෙමින් තිබෙන බවයි මන්ත්රීවරයා පවසන්නේ.
එමෙන්ම, ජාත්යන්තර මූල්ය අරමුදලේ කොන්දේසිවලට අනුව ලංකා විදුලිබල මණ්ඩලය වැනි රාජ්ය ව්යවසායන් පෞද්ගලීකරණය කිරීමට රජය සැලසුම් කරමින් සිටින බවත් IMF කොන්දේසි මත ලංවිම පෞද්ගලීකරණය කිරීමට සමාන පියවරක් 2005 වසරේ චන්ද්රිකා බණ්ඩාරනායක ආණ්ඩුව සමයේ ජනතා විමුක්ති පෙරමුණ කැබිනට් මණ්ඩලයේ සිටියදී ජවිපෙ විසින් ව්යර්ථ කරන ලද බවත් ඔහු පවසනවා.
2022 මාර්තු 2 වැනි දින ජාත්යන්තර මූල්ය අරමුදලේ අධ්යක්ෂ මණ්ඩලය විසින් නිකුත් කරන ලද වාර්තාවේ බදු සහන කපා හැරීම සහ නව බදු පැනවීම, රජය සතු ව්යවසායන් ප්රතිසංස්කරණය කිරීම, පිරිවැය ප්රතිසාධන බලශක්ති මිලයන් හඳුන්වාදීම සහ දූෂණයට එරෙහිව සටන් කිරීම වැනි කොන්දේසි හතරක් පැහැදිලිව දක්වා ඇති නමුත් IMF කොන්දේසි අතරින් දූෂණයට එරෙහි සටන හැර අනෙකුත් වගන්ති පමණක් ක්රියාත්මක කර ඇති බවයි මන්ත්රීවරයා පෙන්වා දෙන්නේ.
ජාත්යන්තර මූල්ය අරමුදලේ කොන්දේසිවලට අනුව ඉන්ධන, ගෑස් මිල සහ විදුලි බිල වැඩි කළ බව පැවසූ ඒ මහතා මෙම වැඩිවීම් පිටුපස ඇති සැබෑ තතු සඟවා නොගෙන රජය ප්රකාශ කළ යුතු බවද පැවසීය.
ආයතනය පෞද්ගලීකරණය කරනවා වෙනුවට විදුලිබල මණ්ඩලය පාඩු ලැබීමට හේතු වූ කරුණු සොයා බලා විසඳුම් ලබාදිය යුතු බවයි වැඩිදුරටත් ඔහු පවසන්නේ