මතභේදකාරී ලෙස අවසන් වූ Mrs. Sri Lanka අවසන් තරඟයේ නිවේදන කටයුතු සිදුකල ජොයෙල් ෆැබියන් මහතාගේ රැකියාව අහිමිවී ඇති බවට තොරතුරු වාර්තා වනවා.
ඔහු MTV/MBC ආයතනයේ ප්‍රවෘත්ති නිවේදකයෙකු ලෙස කටයුතු කර ඇති අතර පසුගියදා පැවති Mrs. Sri Lanka තරඟාවලියේ නිවේදන කටයුතු සිදුකිරීම හේතුවෙන් සේවය අවසන් කර ඇති බවට වන දැනුම්දීමක් සිරස ආයතනයේ මානව සම්පත් කළමණාකරණ අංශය විසින් ජොයෙල් මහතා හට ලබාදී තිබෙනවා.
එලෙස වෙනත් උත්සවයක නිවේදන කටයුතු සිදුකිරීම සිය ආයතන නීති රීතිවලට පටහැනි බවත් එම නිසා ඔහුගේ සේවය අවසන් කර ඇති බවත් ජෙයෙල් මහතාව දැනුවත් කර ඇති බවට පැවසෙනවා.
කෙසේ වෙතත් මේ වන විට දැඩි මතභේදකාරී තත්ත්වයක් ඇතිවී තිබෙන Mrs. Sri Lanka තරඟාවලිය හේතුවෙන් බොහෝ පිරිසකගේ කීර්තිනාමයට හානි ඇතිව තිබෙනවා.
ඊයේ (17) එම තරඟාවලියේ අවසන් තරඟකාරියන් 20 දෙනාගෙන් කිහිප දෙනෙකු සහභාගී වූ මාධ්‍ය හමුවකදී පවසා සිටියේ Mrs. Sri Lanka තරඟාවලියේ සංවිධායකයින් තමන් හට බොරු කල බවයි.
