ශ්‍රී ලංකා මුස්ලිම් කොංග්‍රසයේ මන්ත්‍රීවරුන් පිරිසක් පක්ෂයට නොදන්වා ආණ්ඩුවේ රැස්වීමකට සහභාගී වී ඇති බවට පළ වන මාධ්‍ය වාර්තා සත්‍ය වුවහොත් ඔවුන්ට එරෙහිව දැඩි පියවරක් ගන්නේ යැයි එම පක්ෂයේ ජ්‍යෙෂ්ඨයෙක් ‘නිව්ස් 19’ ට අද(15) පැවැසීය.
මෙම පුවත තමන් දැනගත්තේ ද ජනමාධ්‍ය මගින් යැයි ද එවැනි පියවරකට ශ්‍රී ලංකා මුස්ලිම් කොංග්‍රසයේ කිසිදු ආශිර්වාදයක් නැතැයි ද එම ජ්‍යෙෂ්ඨයා කීය.
විසි වැනි සංශෝධනයට සහාය පළ කළ ශ්‍රී ලංකා මුස්ලිම් කොංග්‍රසයේ මන්ත්‍රීවරුන් පිරිසක් ජනාධිපති කාර්යාලයේ පැවැති සාකච්ඡාවකට පසුගියදා සහභාගී වී ඇති බවට මේ වනවිට මාධ්‍ය වාර්තා පළ වෙමින් පවතී.
කෙසේ වෙතත් විසි වැනි සංශෝධනයට සහාය පළ කළ මන්ත්‍රීවරුන් පිරිස මුස්ලිම් ජනතාවගෙන් සමාව ගත යුතු බවට පක්ෂයේ උත්තරීතර මණ්ඩල රැස්වීමේදී තීරණයක් ගෙන තිබූ නමුත් මෙතෙක් එවැන්නක් ද සිදු නොවීය.
මේ සම්බන්ධයෙන් කළ විමසීමේදී සමගි ජනබලවේගයේ නිලධාරියකු පැවසුවේ මුස්ලිම් කොංග්‍රසය ආණ්ඩුව සමග රහස් ගනුදෙනුවක් කරන්නේ නම් සිය පක්ෂය ඉක්මනින් තීන්දුවක් ගන්නා බවයි.
