මුතුරාජවෙල පරිසර විනාශයට ප්‍රාදේශීය දේශපාලකයන් හා පාතාලය මෙන්ම පොලිසිය ඇතුළු රාජ්‍ය නිලධාරින් පවා සම්බන්ධ යැයි පරිසර ඇමැති මහින්ද අමරවීර මහතා පවසයි.
කෙසේ වෙතත් අදාළ ඉදිකිරීම් සිදුකරන කටයුත්තට පරිසර අනුමැතියක් ලැබී නැතැයි ද ඇමැතිවරයා කියයි.
ඇමැතිවරයා මේ බව සඳහන් කළේ මුතුරාජවෙල මුතුරාජවෙල ප්‍රදේශයේ පිහිටි වන සංරක්ෂණ දෙපාර්තමේන්තුවට අයත්ව තිබුණු අක්කර 700ක පමණ භූමි ප්‍රමාණයක් සංචාරක ව්‍යාපාරික කටයුත්තක් සඳහා ආණ්ඩුව විසින් පෞද්ගලික සමාගමකට පවරා දී ඇති බව පවසමින් කාදිනල් හිමියන් විසින් කරන ලද චෝදනාව සම්බන්ධයෙන් ජනමාධ්‍ය හමුවේ ප්‍රකාශයක් කරමිනි.
පරිසර විනාශයකට අදාළ සිදුවීමක් සම්බන්ධයෙන් තමාට සොයා බලා වාර්තා කරන්නැයි පොලිසියට කළ දැනුම්දීමකට අද වනතුරු තමාට ප්‍රතිචාරයක් ලැබී නැතැයි ද එහිදී ඇමැති අමරවීර මහතා පැවැසීය.
මුතුරාජවෙල ප්‍රදේශයේ දැවැන්ත පරිසර විනාශයක් සිදුවන මෙම ව්‍යාපෘතියට තමන් විරුද්ධ බවත් රටේ නීතියට යටත්ව ආණ්ඩුව කටයුතු නොකරන්නේ නම් ආණ්ඩුවටත් ගෙදර යන්නට සිදුවනු ඇති බවත් කොළඹ අගරදගුරු මැල්කම් රංජිත් කාදිනල් හිමියන් පැවැසුවේ පසුගියදාය.
පාලකයන්ට රට බාර දී ඇත්තේ වසර පහකට පමණක් යැයි ද නීති රීතිවලට අනුව වගකීම ඉටු නොකරන්නේ නම් පාලකයන්ට පාරට බහින්නට සිදුවනු ඇතැයි ද එහිදී කාදිනල්හිමියෝ පැවැසූහ.
