මුතුරාජවෙල පරිසර කලාපයේ විශාල ප්රමාණයේ හෙලිකොප්ටර් අංගනයක් සෑදීමට අනුමැතිය ලබාදීමේ සිද්ධියක් සම්බන්ධයෙන් රජයේ ගිණුම් පිළිබඳ පාර්ලිමේන්තු කාරක සභාවේ (COPA කමිටුව) අවධානය යොමුව තිබෙනවා.
මේ සම්බන්ධයෙන් වහාම වාර්තාවක් ඉදිරිපත් කරන ලෙසයි වනජීවී අධ්යක්ෂ ජනරාල් චන්දන සූරියබණ්ඩාර මහතාට COPA කමිටුව දැනුම්දී ඇත්තේ.
එමෙන්ම, අනවසරෙන් මුතුරාජවෙල තෙත්බිම් කලාපයට ඇතුළුවී පරිසර පද්ධතියට බලපෑම් වන ආකාරයෙන් සිදුවන ක්රියාකාරකම් නැවැත්වීමට වහාම පියවර ගන්නා ලෙසත් පරිසරයට බලපෑම්වන ව්යාපෘතිවල බලපත්ර අත්හිටුවන ලෙසත් කමිටුව අදාළ අංශවලට උපදෙස් දෙන ලදි.
මුතුරාජවෙල වගුරු බිමෙන් පර්චස් 65,102ක් පර්චසය රුපියල් 500 බැගින් මිලදී ගැනීමට පෞද්ගලික සමාගමක් කටයුතු කිරීම සඳහා උදව් කළ ගොවිජන සේවා නිලධාරීන්ට විරුද්ධව කිසිදු පරීක්ෂණයක් පවත්වා නැති බව පෙන්වා දුන් කමිටුව නාගරික සංවර්ධන අධිකාරියට සහ අදාළ පළාත් පාලන ආයතනවලට නියෝග කළේ කඩා ඉවත් කෙරෙන ගොඩනැගිලිවල අබලි ද්රව්ය සහ වෙනත් අපද්රව්ය මුතුරාජවෙල පරිසර කලාපයට බැහැර කරන අයට එරෙහිව දැඩි නීතිමය පියවර ගන්නා ලෙසයි
හෙක්ටයාර් 6,232ක් වන මුතුරාජවෙල රක්ෂිතයේ හෙක්ටයාර් 3,068 ක් පාරිසරික වශයෙන් වැදගත් තෙත් බිම් කලාපයක් ලෙස හඳුනාගෙන ඇති බව කමිටු වාර්තාවේ දැක්වේ.