ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ මහතා ඉවත් කිරීමට අවශ්‍යම නම් ඔහු වෙනුවෙන් ඉවත්වීමට තමා සූදානම් බව විදේශ කටයුතු අමාත්‍ය අමාත්‍ය, ජනාධිපති නීතිඥ අලි සබ්‍රි පවසනවා.
ඒ, අද (2) අයවැය විසර්ජන පනත් කෙටුම්පත පිළිබඳ දෙවැනි වර කියවීමේ විවාදයේදී පාර්ලිමේන්තුව අමතමින්.
තමා මුදල් අමාත්‍යවරයා ලෙස සිටි සමයේ ගත් සියලු තීන්දු තීරණවල වගකීම භාර ගැනීමට තමන් සූදානම් බවයි එහි දී ඔහු කියා සිටියේ.
මහ බැංකු අධිපතිවරයා පස්සේ පැන්නීමෙන් වළකින්නැයි තමා සියලු දෙනාගෙන් ඉල්ලීමක් කරන බවත් ඔහු කියූ දේ ඉටු කළ පුද්ගලයකු බවත් විදේශ කටයුතු අමාත්‍යවරයා පවසනවා.
මෙහි දී වැඩිදුරටත් අදහස් දැක් වූ විදේශ කටයුතු අමාත්‍යවරයා,
“සල්ලි නෑ ගෙවන්න, ඩොලර් මිලියන 203ක් ගෙවන්න තියනවා. භාණ්ඩාගාරයේ තිබ්බෙ අමෙරිකානු ඩොලර් තිස් හත් දාහයි. එතකොට ඒවා ගෙවනව ද ණය ගෙවනව ද? මට හිතා ගන්න බෑ! මම ඒ වගකීම බාර ගත්තා. මම ඒ තීරණය අවශ්‍ය අයත් එක්ක සාකච්ඡා කළා. මට ඒ තීරණය ගන්න මහ බැංකු අධිපතිතුමා අවශ්‍ය උපදෙස් දුන්නා. නමුත් කාට හරි ඔහුව ඉවත් කරන්න ඕන නම්, මම පැත්තකට යන්නම්, එතුමාව තියා ගන්න. ඔහු ගත්ත තීරණවලින් අද ජනතාවට ප්‍රතිලාභ ලැබෙනවා. බොරුවට මිනිස්සු පස්සෙ යන්න එපා. මේ වගේ නිර්භීත තීරණ ගන්න මිනිස්සු තියාගන්න ඕන.” යනුවෙන් ඔහු ප්‍රකාශ කළා.”
