දිල්ලි ක්‍රයිම් එමී දිනලා

අන්තර්ජාලයෙන් පැවැත් වූ 48 වැනි ජාත්‍යන්තර එමී සම්මාන උළෙලේ හොඳම Drama Series සඳහා වන සම්මානය ඉන්දීය කතා මාලාවක් වන Delhi Crime සඳහා හිමි විය.

මෙය ඉන්දියානු කතා මාලාවක් එමී සම්මානයක් ලස මුල්ම අවස්ථාවය. එම සම්මාන උළෙලේ අවසන් නිර්දේශ සඳහා ඇමෙරිකාව, එංගලන්තය, බ්‍රසීලය, ආජන්ටිනාව, ජර්මනිය, ප්‍රංශය ඇතුළු රටවල් 20ක නිර්මාණ ඉදිරිපත් වී තිබුණි.

දිල්ලි ක්‍රයිම් කතා මාලාව ඉන්දියාවේ ආන්දෝලනයට ලක් වූ බස් රථයකදී ශිෂ්‍යාවක සමූහ දූෂණයට ලක් කිරීමේ සිදුවීම හෙවත් නිර්භයා සිදුවීම අළලා නිර්මාණය කළ එකකි. එය රිචී මෙහෙතාගේ අධ්‍යක්ෂණයක් වන අතර සෙෆාලි ෂා, රසිකා ඩුගාල්, ආදිල් හුසේන් ආදී නළුනිළියන් රංගනයෙන් එක් වූ එකකි. සම්මානය ලබාගනිමින් රිචී මෙහ්තා එම සමූහ දූෂණයට ලක් වූ කාන්තාවට සහ ඇගේ මවට ගෞරවය පුද කළාය.

එහිදී හොඳම නළුවාට හිමි සම්මානය එංගලන්තයේ ‘Responsible Child’ කතා මාලාවේ රඟපෑ බිලී බැරට්ට හිමි විය. හොඳම නිළිය සම්මානය Elizabeth Is Missing කතා මාලාවේ රඟපෑ එංගලන්තයේ ග්ලෙන්ඩා ජැක්සන්ට හිමි විය.

කෙසේ වෙතත් මෙම ජාත්‍යන්තර එමී සම්මාන උළෙල ලොව ඉහළ කතාබහකට ලක්වෙන, වසර 72ක් පැරණි ඇමෙරිකානු එමී සම්මාන උළෙල නොවේ. එය ‘ Academy of Television Arts & Sciences‘ ආයතනයෙන් සංවිධානය කරන්නකි. ජාත්‍යන්තර එමී සම්මාන උළෙල සංවිධානය කරන්නේ International Academy of Television Arts and Sciences විසිනි.

මෙවර ඇමෙරිකානු එමී සම්මාන උළෙලේදී හොඳම කතා මාලාවට හිමි සම්මානය ලබාගත්තේ එච්බීඕ කතාමාලාවක් වන Succession විසිනි. මීට පෙර ගේම් ඔෆ් ත්‍රෝන්ස්, බ්‍රේකින් බෑඩ් වැනි කතා මාලා ඇමෙරිකානු එමී සම්මානය ජයගෙන තිබුණි.