ඇමරිකාවේ නිව්යෝර්ක් නගරයට ඊයේ ඇද හැලුනු අධික වර්ෂාව සමඟ හටගත් ජල ගැලීම් තත්වයෙන් නගරයේ උමං මාර්ග සහ ප්‍රධාන මාර්ග රැසක් ජලයෙන් යට වී තිබෙනවා.
විදෙස් මාධ්‍ය පවසන්නේ මාර්ගයේ ගමන්ගත් වාහන රැසක්ම ජලයෙන් යටවීම හේතුවෙන් එම ස්ථානවලම සිරවී ඇති බවයි.
මේ හේතුවෙන් නිව්යෝර්ක් නගරයට හදිසි තත්වයක්ද ප්‍රකාශයට පත් කර ඇති අතර, පාසල් සහ රජයේ කාර්යාලද වසා දමා තිබෙනවා.
විදෙස් වාර්තා සඳහන් කළේ මෙම තත්වය හේතුවෙන් ලගාර්ඩියා ගුවන් තොටුපලේ එක් පර්යන්තයක්ද වසා දමා ඇති බවයි.
මිලිමීටර 177 ක් ඉක්මවා ඇද හැලුනු මෙම වර්ෂාව වසර ගණනකින් නිව්යෝර්ක් නගරයට ලැබුණු වැඩිම වර්ෂාපතනය බවටද වාර්තා වෙනවා.
මේ අතර, මෙම තත්වය හමුවේ ආරක්ෂිතව සිටීමට පියවර ගන්නා ලෙසත් කිසිවිටක ගංවතුරින් යට වූ මාර්ගවල ගමන් කිරීමට උත්සාහ නොකරන ලෙසත් නිව්යෝර්ක් ආණ්ඩුකාරවරිය ජනතාව ගෙන් ඉල්ලා තිබෙනවා.
