නවසීලන්තයේ විශාලම නගරය වන ඕක්ලන්ඩ් නගරයෙන් එක කොවිඩ් ආසාදිතයෙක් හමුවීමත් සමගම මුළු රටම වසා දැමීමට නවසීලන්ත අගමැතිනිය තීරණය කර තිබෙනවා.
එමෙන්ම මේ වන විටත් මුළු රටම ආවරණය වන පරිදි දැඩි සංචරණ සීමා පැනවීමට හා සෞඛ්‍ය මාර්ගෝපදේශ ක්‍රියාත්මක කිරීමට අගමැතිනී ජසින්ඩා ආර්ඩන් තීරණය කර ඇති බවයි විදෙස් මාධ්‍ය වාර්තා කරන්නේ.
හඳුනාගත් ආසාදිතයාට ඩෙල්ටා ප්‍රභේදය ආසාදනය වී ඇතැයි යන අනුමානය මත තමා එවැනි තීරණයක් ගත් බව ආර්ඩන් අගමැතිනිය පවසනවා.
ඕක්ලන්ඩ් නගරයෙන් වාර්තාවන එම කොවිඩ් ආසාදිතයා අද (17) හදුනාගෙන ඇතිබවට එරට මාධ්‍ය වාර්තා කරනවා.
ඒ අනුව ඕක්ලන්ඩ් නගරය සතියක් වසාදැමෙන අතර අනෙක් ප්‍රදේශ දින තුනක් සඳහා වසාදැමෙනු ඇති.
