‘ඥානා අක්කාගේ හෝටලය හදන්නේ හමුදාවෙන්’ යනුවෙන් News19 කරන ලද හෙළිදරව්වෙන් පසු අදාළ සේවා සඳහා නීතිවිරෝධී ලෙස යොදවා තිබූ හමුදා සාමාජිකයන් ඉන් ඉවත් කර තිබේ.
පසුගිය 06 වැනිදා මෙම යුද හමුදා සාමාජිකයන් අදාළ ස්ථානයෙන් ඉවත් කර ඇති අතර, මේ වනවිට අදාළ දේවාල භූමියේ යුද හමුදා සාමාජිකයන් නොමැති බව විශ්වාස කටයුතු ආරංචි මාර්ග තහවුරු කරයි.
අනුරාධපුර, නුවර වැව පාරේ පිහිටි මේ කාන්තාවට අයත් දේවාලය යනුවෙන් හඳුන්වන ස්ථානයේ පිටුපස කොටසේ අදාළ හෝටලයේ ඉදිකිරීම් සිදුවෙමින් පැවැති අතර, ඊට අමතරව එම භූමිය වටකර විශාල තාප්පයක් ද හමුදා සාමාජිකයන් යොදවා ඉදිකරමින් පැවතිණි.
රට පාලනය කරන්නේ අනුරාධපුරයේ ඥානා අක්කා දැයි ආණ්ඩුවට සමීප පාර්ශ්ව විසින් ම ජනාධිපතිවරයාගෙන් කළ විමසීම් නිසා මෙම කාන්තාව මාධ්‍ය මගින් ප්‍රසිද්ධියට පත් විය.
කෙසේ වෙතත් මෙසේ යුද හමුදා සාමාජිකයන් යොදවා පෞද්ගලික ඉදිකිරීමක් කිරීම නීතිවිරෝධී බව යුද හමුදාවේ ජ්‍යෙෂ්ඨ නිලධාරියෙකු උපුටා දක්වමින් ‘ලංකා’පුවත්පතද මේ පිළිබඳව වාර්තා කර තිබුණි.
මේ සම්බන්ධයෙන් පසුගිය සතියේ කළ විමසීමේදී යුද හමුදා මාධ්‍ය ප්‍රකාශක බ්‍රිගේඩියර් චන්දන වික්‍රමසිංහ සඳහන් කළේ එවැන්නක් පිළිබඳ නිල දැනුම්දීමක් තමන්ට ලැබී නොමැති බවයි.
එය ප්‍රතික්ෂේප කරන බවක් හෝ අදාළ තොරතුර අසත්‍ය බවක් පැවසවේ නැත.
