රනිල් වික්‍රමසිංහට අගමැති ධුරය ලබාදී ජාතික ආණ්ඩුවක් පිහිටුවීමට සුදානම් බවට පැතිර යන ප්‍රචාරයන් අගමැති මහින්ද රාජපක්ෂ විසින් තරයේ ප්‍රතික්ෂේප කර ඇති බව ‘ඩේලි මිරර්’ පුවත්පත වාර්තා කර සිටිනවා.
රනිල් වික්‍රමසිංහ යනු තමන්ගේ හොඳ මිතුරෙකු වූවත්, ප්‍රතිපත්තිමය වෙනස්කම් හේතුවෙන් එක ආණ්ඩුවක වැඩ කිරීම අසීරු බවයි ඔහු පවසන්නේ.
ජාතික ආණ්ඩුවක් නිර්මාණය කිරීම උදෙසා හිටපු අගමැති රනිල් වික්‍රමසිංහ මහතා සහ රාජපක්ෂ පවුලේ සාමාජිකයන් අතර සාකච්ඡාවක් සිදුවන්නේ දැයි අරලියගහ මන්දිරයේදී මාර්තු 11 වැනිදා පැවති හමුවකදී මාධ්‍යවේදීන් අග්‍රාමාත්‍ය මහින්ද රාජපක්ෂ මහතාගෙන් විමසීමක් කර ඇති අතර ජාතික ආණ්ඩුවක් රටට අවශ්‍ය නොමැති බවත්, කිසිඳු පක්ෂයක් සමග ජාතික ආණ්ඩුවක් හදන්නට සාකච්ඡා නොකරන බවත්, තනිව අර්බුදය විසඳීමට රාජපක්ෂවරුන්ට හැකි බවත් අගමැතිවරයා එහිදී අවධාරණය කර ඇති බව පුවත්පත අවධාරණය කර සිටිනවා.
මේ අතර, ‘ජාතික සංවිධාන එකමුතුවේ’ වෛද්‍ය වසන්ත බණ්ඩාර මහතා පසුගියදා පැවති මාධ්‍ය හමුවකදී පවසා සිටියේ බැසිල් රාජපක්ෂ අමාත්‍යවරයාගේ අනුදැනුම මත නිර්මාණය කෙරෙන බවට පැවසෙන ජාතික ආණ්ඩුවේ අගමැතිවරයා රනිල් වික්‍රමසිංහ බවත්, සෞඛ්‍ය අමාත්‍යවරයා වෛද්‍ය රාජිත සේනාරත්න බවත් ය.
