පේදුරුතුඩුවේ සිට දෙවුන්දරතුඩුව දක්වාත්, බස්නාහිර සිට නැගෙනහිර දක්වාත් විසිරී සිටින පාසල් දරුවන් හා ගුරුවරුන් හෙට පාසලට පැමිණීම කිසිවෙකුටත් නැවැත්විය නොහැකි බව අධ්යාපන අමාත්ය දිනේෂ් ගුණවර්ධන මහතා පවසනවා.
නිවේදනයක් නිකුත් කරමින් ඒ මහතා සදහන් කරන්නේ පාසල් දරුවන්ගේ අනාගතය දෙමව්පියන්ගේ සතුට පමණක් නොව මුළු මහත් ජාතියේම සතුට බවයි.
අධ්යාපනය යනු ජාතියේ අනාගතය බවත් ජාතියේ දියුණුවේ ශක්තිය බවත් ගුරුවරුන්ගේ වැටුප් වැඩිවීමට ජනාධිපති, අගමැති සහ මුදල් අමාත්යවරයා මැදිහත් වී විශ්වාසනීය විසඳුමක් ඉදිරිපත් කර ඇති බවත් නිවේදනය මගින් අධ්යාපන අමාත්යවරයා පෙන්වා දෙනවා.
එමෙන්ම කලකින් නුදුටු සිය සිසු දරු දැරියන්ගේ සතුටු මුහුණු සජීවීව දකින්නට ගුරු පියවරුන් ගුරු මෑණිවරුන් හෙට පාසලට එනු ඇති බවත් නිවේදනයේ වැඩිදුරටත් සඳහන්.
හෙට (21) දිනයේ සිට අදියර කිහිපයක් යටතේ පාසල් විවෘත කිරීමට අධ්යාපන අමාත්යාංශය මේ වන විටත් කටයුතු කර තිබෙනවා.
ඒ අනුව සිසුන් 200 ට අඩු පාසල්වල අධ්යයන කටයුතු හෙට සිට ආරම්භ කෙරුණත් වර්ජනයේ නිරත ගුරු සංගම් ඊට සිය විරෝධය පලකර සිටිනවා.