අද (30) දිවයින පුරා පැය 10ක් පුරාවට විදුලි කප්පාදුවක් සිදු වීමට නියමිත බව මහජන උපයෝගිතා කොමිසමේ සභාපති ජනක රත්නායක මහතා ඊයේ දින නිවේදනය කර සිටියා.
ඒ අනුව අද උදෑසන 8 සිට රාත්‍රී 12 දක්වා කාලය අතරතුර පැය 10ක කාලයක් එලෙස දිවයින පුරා විවිධ කාලපරාසයන් හිදී එම විදුලි කප්පාදුව සිදුවෙනු ඇති බවයි ඒ මහතා පවසා සිටියේ.
කෙසේ වෙතත් අත්‍යවශ්‍ය සේවා සඳහා විදුලිය කප්පාදුවක් සිදු නො කරන බව මහජන උපයෝගිතා කොමිෂන් සභාව සඳහන් කළ අතර එසේ විදුලිය කප්පාදු සිදු නො කරන ප්‍රදේශවලට ජනාධිපති නිල නිවස, පාර්ලිමේන්තුව හා මාදිවෙල මන්ත්‍රී නිවාස ද ඇතුළත් බවයි වාර්තා වන්නේ.
මේ අතර,ජල විදුලිය නිෂ්පාදනය කළ හැකි වන්නේ තවත් සතියක කාලයක් පමණක් බව විදුලි බල මණ්ඩලය පවසනවා.
ඒ, වියළි කාලගුණය හේතුවෙන් විදුලි බලාගාර ආශ්‍රිත ජලාශ වල ජල මට්ටම සිඝ්‍ර ලෙස අඩුවීම නිසාවෙන්.
අවශ්‍ය ප්‍රමාණයට ඛනිජ තෙල් සංස්ථාව ඉන්ධන ලබා නොදීම නිසා තවදුරටත් විදුලි උත්පාදනයට බාධා මතුවනු ඇති බවයි විදුලිබල මණ්ඩලය සඳහන් කරන්නේ.
තවද, ඉදිරියේ දී විදුලි කප්පාදුව සිදුකෙරෙන පැය ගණන දීර්ඝ කිරීමට සිදුවනු ඇතැයි ලංකා විදුලි බල මණ්ඩලයේ, විදුලි ඉංජිනේරු සංගමය පවසනවා.
ඒ, මේ වනවිට ලැබී ඇති තෙල් ප්‍රමාණය ප්‍රමාණවත් නොවීම හේතුවෙන්.
