2022 වසර සඳහා රජය ගෙන ආ අයවැය තුළ මේ දිනවල ජනතාව දැඩි ලෙස පීඩාවට පත්ව සිටින උද්දමනය පාලනය කිරීමට කිසිදු වැඩපිළිවෙළක් තාවකාලිකව හෝ යෝජනා නොවුණු බවට විපක්ෂය චෝදනා කරනවා.
ආහාර, ගෑස්, කිරිපිටි, ඉන්ධන, සිමෙන්ති ඇතුළු සියලු ක්ෂේත්‍රයන්හී සියලු භාණ්ඩ මිල දිනපතා වැඩිවන තත්ත්වයක් තුළදී ඒ පිළිබදව සැලකිල්ලක් නොදැක්වීම ජනතාව කෙරෙහි ආණ්ඩුව තුළ ඇති ආකල්පය පැහැදිලි වන බවයි විපක්ෂ මන්ත්‍රීවරුන් පවසන්නේ.
ජනතා විමුක්ති පෙරමුණේ නායක අනුර කුමාර දිසානායක මහතා පවසන්නේ මෙය කෝටි තුන් ලක්ෂයකට අධික මුදලක් ණය වශයෙන් ලබාගන්නා අයවැයක් බවට පත්වී ඇති බවයි.
අයවැයෙන් පසු පැවති තේ පැන් සාදයට සහභාගි නොවී පාර්ලිමේන්තු පරිශ්‍රයෙන් පිටව ගිය සමගි ජනබලවේගය පක්ෂයේ පාර්ලිමේන්තු මන්ත්‍රී හේෂා විතානගේ මහතා පැවසුවේ ජනතාවට ප්ලේන්ටියක් හෝ නොමැති තත්ත්වයකදී තේ පැන් සාද සඳහා සහභාගි නොවන බවයි.
කෙසේවෙතත් පවතින ආර්ථික අවපාතයත් සමඟ සක්‍රයා ආවත් ජනතාවට විශේෂ සහන ලබාදීමට නොහැකි බව කම්කරු අමාත්‍ය නිමල් සිරිපාල ද සිල්වා මහතා පවසනවා.
