ඇමරිකානු හමුදාව සහ ඇෆ්ගනිස්තාන හමුදාව සතුව තිබී තලේබාන් සංවිධානය අතට පත්වූ ආයුධ තොගය ලෝකයට බලවත් තර්ජනයක් විය හැකි බවට ආරක්ෂක විශ්ලේෂකයන් පිරිසක් අනතුරු අගවා තිබේ.
ඔවුන් සදහන් කර ඇත්තේ මෙම අවි ලොව පුරා ජිහාඩ් ත්‍රස්තවාදී ක්‍රියාවන්ට යොදා ගැනීමේ අවදානමක් ඇති බවයි.
ඇමරිකානු හමුදාව සතුව තිබූ ඩොලර් මිලියන 230 ක් පමණ වටිනා යුද උපකරණ තලේබාන් සංවිධානය සතුවී ඇති බව විශ්වාස කෙරේ.
ඇෆ්ගනිස්තාන පොලිසිය සතුව තිබූ ඩොලර් මිලියන 19 ක් පමණ වටිනා යුද උපකරණ ද තලේබාන්වරුන් අතට පත්ව ඇති බව පැවසේ.
යුද අවි, උණ්ඩ, යුද රථ පමණක් නොව විවිධ ප්‍රහාරක යානා සහ හෙලිකොප්ටර් ද මෙහිදී තලේබාන් සංවිධානය සතුව ඇති බව වාර්තා වේ.
ඇමරිකානු බ්ලැක්හෝක් හෙලිකොප්ටර්, රැසියාවේ නිෂ්පාදිත MI 17 වර්ගයේ හෙලිකොප්ටර් මෙන්ම බ්‍රසීලයේ නිෂ්පාදනයක් වන AN 29 ප්‍රහාරක යානා ද තලේබාන් සංවිධානය සතුවූ ගුවන් ශක්තිය අතර වේ.
මෙම තත්වය සම්බන්ධයෙන් ලෝකය වහා අවධානය යොමු කළ යුතු බවත් එසේ නොවුණහොත් මෙම අවි ආයුධ ලොව පුරා විවිධ විනාශකාරී ක්‍රියාවන්ට යෙදවීමේ අවදානමක් ඇති බවත් අදාළ ආරක්ෂක විශේෂඥයෝ සදහන් කරති.
