සංචාරක ශ්රී ලංකා කණ්ඩායම සමග පැවැති ටෙස්ට් තරගාවලිය 2 – 0 ක පූර්ණ තරගාවලි ජයක් ලබන්නට සත්කාරක නවසීලන්තය සමත් වුණා.
ඒ වෙලින්ටන් හි පැවැති දෙවැනි තරගය තවත් දිනයක් ඉතිරිව තිබියදීම ඉනිමකින් සහ ලකුණු 58කින් ජය ගනිමින්.
ඉනිම පරාජයෙන් බේරීම සඳහා ලකුණු 416ක් ලබා ගැනීමට සිදු වූ ශ්රී ලංකා පිතිකරුවන්ට තරගයේ සිව්වැනි දිනය නිමා වීමට කෙටි වේලාවක් ඉතිරිව තිබියදී සියලු දෙනා දැවී ලබා ගත හැකි වූයේ ලකුණු 358ක් පමණයි.
සිව්වන දිනට තරගය ආරම්භ කරන විට මැතිව්ස් එක් ලකුණක් සහ කුසල් මෙන්ඩිස් ලකුණු 50ක් ලබා ගෙන කඩුල්ලේ රැඳී සිටියා.
තරගයේ පළමු පන්දු වාරයේදීම මෙන්ඩිස් දැවී ගිය අතර ඊට ටික වේලාවකට පසු මැතිව්ස් ද නැවත ක්රීඩාගාරයට හරවා යැවීමට නවසීලන්ත පන්දු යවන්නන් සමත් වුණා.
ධනංජය සහ චන්දිමාල් පස්වැනි කඩුල්ලට ලකුණු 126ක සබඳතාවක් ගොඩ නැඟුවද ලකුණු 62ක් ලබා සිටි චන්දිමාල් දිවා විවේකයට පෙර දවා ගන්නට තික්නර් සමත් වුණා.
ධනංජය සිය ශතකය පෙනි පෙනී අනවශ්ය පහරක් එල්ල කිරීමට යාමෙන් ලකුණු 98කට දැවී ගියා.
කසුන් රාජිත පසුපෙළ රැකගනිමින් නවසීලන්ත ජයග්රහණය පමා කිරීමට සමත් වුණේ මිනිත්තු 148ක් පිටියේ රැඳී සිටිමින්.
ශ්රී ලංකා ඉනිමේ අවසන් කඩුල්ල ලෙස දැවී යන විට ඔහු පන්දු 110කට මුහුණ දී ලකුණු 20ක් ලබා ගෙන සිටියා.
ශ්රී ලංකා දෙවැනි ඉනිමේ අර්ධ ශතක 4ක් වාර්තා වුවත්, කරුණාරත්න (51) , මෙන්ඩිස් (50), චන්දිමාල් (62) සහ ධනංජය (98) අනවශ්ය පහරවලට යෑමෙ ප්රතිඵලයක් ලෙස කඩුලු පූජා කරන්නට සිදුවුණා.
පන්දු යැවීමේදී තික්නර් සහ සවුතී කඩුලු 3 බැගින් දවා ගත්තා.
නවසීලන්තය පළමු ඉනිම සඳහා කඩුලු 4ක් දැවී ලකුණු 580ක් ලබා ගෙන ඉනිම අත්හිටුවා ශ්රී ලංකාවට පන්දුවට පහරදීම සඳහා ආරාධනා කළා.
පළමු ඉනිම සඳහා ශ්රී ලංකා කණ්ඩායමට සියලු දෙනා දැවී රැස් කර ගැනීමට හැකි වූයේ ලකුණු 168ක් පමණයි.