බොදුබල සේනා සංවිධානයේ මහලේකම් පූජ්‍ය ගලගොඩඅත්තේ ඥානසාර හිමිගේ ප්‍රධානත්වයෙන් යුත් ‘එක රටක්, එක නීතියක්’ ජනාධිපති කාර්ය සාධක බලකාය පිහිටුවීම පිළිබඳව තමන් නොදන්නා බව අධිකරණ අමාත්‍ය අලි සබ්රි මහතා පවසනවා.
එම ජනාධිපති කොමිසම පිළිබදව සන්ඩේ ටයිම්ස් පුවත්පත අමාත්‍යවරයාගෙන් සිදුකල විමසීමකදී අලි සබ්රි මහතා පවසා ඇත්තේ එම කාර්ය සාධක බලකාය පිහිටුවීම සදහා අධිකරණ අමාත්‍යවරයා ලෙස තමන්ගෙන් උපදෙස් ලබා නොගත් බවයි.
එමෙන්ම පූජ්‍ය ගලගොඩඅත්තේ ඥානසාර හිමිගේ සභාපතිත්වයෙන් එම ජනාධිපති කාර්ය සාධක බලකාය පිහිටුවීම පිළිබදව තමන් සතුටු නොවන බවද අමාත්‍යවරයා සදහන් කර තිබෙනවා.
සන්ඩේ ටයිම්ස් පුවත්පත වාර්තා කරන්නේ එම ජනාධිපති කාර්ය සාධක බලකාය පූජ්‍ය ගලගොඩඅත්තේ ඥානසාර හිමිගේ සභාපතීත්වයෙන් යුක්තව පිහිටුවා ඇති බවට හෝ තමන් එහි සාමාජිකත්වය දරණ බවට කිසිදු මුස්ලිම් සාමාජිකයෙකු දැන නොසිටි බවයි.
‘එක රටක්, එක නීතියක්’ ජනාධිපති කාර්ය සාධක බලකායේ සාමාජිකයෙකු ලෙස නම්කර සිටින කොළඹ නාගරික මන්ත්‍රී කලීල් රහුමාන් මහතා සදහන් කර ඇත්තේ මෙම ජනාධිපති කාර්ය සාධක බලකායට තමන් පත්කර ඇති බව දැනගත්තේ ජනමාධ්‍යවලින් බවයි.
කලීල් රහුමාන් මහතා එක්සත් සාම සන්ධානය (UPA) යටතේ පසුගිය බස්නාහිර පළාත් මැතිවරණයට තරඟකොට කොළඹ නාගරික මන්ත්‍රීවරයෙකු ලෙස තේරී පත්ව තිබෙනවා.
එම පක්ෂයේ නායක බෂීර් සේගු දාවුද් මහතා පවසන්නේ එළැඹෙන සතියේ රැස්වී මෙම ගැටළුව පිළිබදව සාකච්ඡා කරන බවයි.
යම් හෙයකින් කලීල් රහුමාන් මහතා ඥානසාර හිමි යටතේ එම ජනාධිපති කාර්ය සාධක බලකායේ සාමාජිකත්වය ලබාගතහොත් ඔහුට එරෙහිව පක්ෂය විනය ක්‍රියාමාර්ග ගන්නා බවද බෂීර් මහතා සදහන් කරනවා.
නිවේදනයක් නිකුත් කරමින් සමස්ත ලංකා ජමියතුල් උලමා සංවිධානය පවසන්නේ ‘ආන්දෝලනාත්මක පුද්ගලයෙකුගේ’ නායකත්වය යටතේ ‘එක රටක්, එක නීතියක් සඳහා ජනාධිපති කාර්ය සාධක බලකාය’ පිහිටුවීමෙන් තමන් කම්පනයට සහ කලකිරීමට පත් වූ බවයි.
