සමගි ජන බලවේගයට ලබන 16වැනිදා කොළඹ හයිට් පිටියේ රැස්වීමක් පැවැත්වීමට ලබා දී තිබූ අවසරය අත්හිටුවා තිබෙනවා.
ඒ, සෞඛ්‍ය අමාත්‍යවරයා නිකුත් කළ අතිවිශේෂ ගැසට් නිවේදනයට අනුකූලවයි.
නිරෝධායනය සහ රෝග වැළැක්වීමේ ආඥාපනතට සංශෝධන කිහිපයක් එකතුකරමින් සෞඛ්‍ය අමාත්‍ය කෙහෙළිය රඹුක්වැල්ල මහතා විසින් අතිවිශේෂ ගැසට් පත්‍රයක් නිකුත් කර තිබෙනවා. එම ගැසට් නිවේදනයට අනුව ඒකරාශීවීම්, එවැනි ක්‍රියාකාරකම් හෝ රැස්වීම් පැවැත්වීම සම්බන්ධයෙන් නිසි බලධාරීයාගෙන් අවසර ලබාගත යුතු අතර එසේ අවසර ලබානොගෙන එවැනි ක්‍රියාකාරකම්වල නිරතවිය නොහැකි බව සඳහන් වේ.
කෙසේ නමුත් සමගි ජන බලවේගය පවසන්නේ රජයේ ගැසට් නිවේදන නොසලකා “සාපය දැන් ඇති – අපි එනවා කොළඹට” යන මැයෙන් පැවැත්වෙන විරෝධතාවය පවත්වන බවයි.
“අපි දැක්කා ආණ්ඩුව පක්ෂ සම්මේලනය නෙළුම් පොකුණේ පැවැත්වුවා. ඒකට සෞඛ්‍ය නීති රෙගුලාසි නෑ. ආණ්ඩුව මොන නීතිරීති දාලා මේක මර්දනය කරන්න හැදුවත් මේක නවත්වන්න හැදුවත් සමගි ජන බලවේගය හැටියට අපි ඒකට මුහුණදීගෙන ගොවි ජනතාවගේ ඉල්ලීම් වෙනුවෙන්, රජයේ සේවකයින්ගේ ඉල්ලීම් වෙනුවෙන් සමගි ජන බලවේගය සජිත් ප්‍රේමදාස මහතාගේ නායකත්වය යටතේ 16 වෙනිදාට අපේ විරෝධතාවය පවත්වනවා.” යැයි සමගි ජන බලවේගයේ පාර්ලිමේන්තු මන්ත්‍රී මුජිබර් රහුමාන් මහතා පවසනවා.
