“ආණ්ඩුව පෙරළන්න. රට පෙරළන්න එපා” යැයි ජනමාධ්‍ය අමාත්‍ය ඩලස් අලහප්පෙරුම මහතා පවසනවා.
අමාත්‍යවරයා මෙම අදහස් පලකළේ පුවත්පත් ප්‍රධාන කතෘවරුන් සමඟ පැවති හමුවකදීයි.
ජනතාව කුපිත කරවන අන්දමින් ප්‍රවෘත්ති පලකිරීමෙන් වළකින ලෙසද අමාත්‍යවරයා මෙහිදී පුවත්පත් කතෘවරුන්ගෙන් ඉල්ලා සිටියා.
“අද රටේ ඇතිවී තිබෙන ප්‍රශ්න ප්‍රචණ්ඩත්වයෙන් විසදන්න බැහැ. මිරිහානේ සාමකාමීව පැවති උද්ඝෝෂණයට පිටස්තර පුද්ගලයින් පැමිණ ප්‍රචණ්ඩත්වයක් ඇති කර තිබෙනවා. 3 වෙනිදා පැවැත්වෙන බව කියන උද්ඝෝෂණය සාමකාමීව පවත්වනු ඇතැයි මම විශ්වාස කරනවා. ජනතාවට උද්ඝෝෂණය කිරීමේ අයිතිය තියෙනවා. එහිදී ප්‍රචණ්ඩත්වයක් ඇති කෙරෙන ආකාරයට මාධ්‍යවලින් හෝ වෙනත් ක්‍රමවලින් කටයුතු කිරීම සුදුසු නැහැ කියා මා සිතනවා. පවතින අර්බුදය හමුවේ ආණ්ඩුව කෙරෙහි ජනතාව කළකිරීමෙන් ඉන්නෙ. අද ජනතාව සෑහෙන ප්‍රශ්න ගොඩකට මුහුණදී සිටින බව රහසක් නොවෙයි. මේ අවස්ථාවේ මාධ්‍යකරණයේදී පිටස්තරයෙකු ලෙසින් කටයුතු කරන ලෙස මම ඉල්ලනවා.
