පහන්තුඩාව දියඇල්ල අසළ අසභ්ය වීඩියෝ දර්ශනයේ සිටින යුවල පසුගිය මස දෙවනදා පස්වරුවේ අපරාධ පරීක්ෂණ දෙපාර්තමේන්තුවේ සමාජ ජාලා විමර්ශන ඒකකය විසින් අත්අඩංගුවට ගනු ලැබුවා.
ඒ, අසභ්ය වීඩියෝපට නිෂ්පාදනය කිරීමේ චෝදනාව මතයි.
එමෙන්ම, අදාල වීඩියෝ පටය ළඟ තබා ගැනීම හා පුද්ගලයින් අතර බෙදා හැරීම තහනම් බවත් එය ශ්රී ලංකාවේ නීතිය යටතේ දඩුවම් ලැබිය හැකි අපරාධමය වරදක් බවත් ශ්රී ලංකා පොලිසිය දැනුම් දෙනු ලැබුවා.
කෙසේ වෙතත් පසුව සිද්ධිය සම්බන්ධයෙන් අත්අඩංගුවට ගත් තරුණයා කොවිඩ් ආසාදිත පුද්ගලයෙක් බවට හඳුනාගත් අතර සැකකරුවන් අධිකරණයට ඉදිරිපත් නොකර පොලිස් ඇප මත මුදා හරිනු ලැබුවා.
ඉන් පසුව නැවත අධිකරණයට ඉදිරිපත් කිරීමේදී පහන්තුඩාව දියඇල්ල පසුබිම් කරගනිමින් අසභ්ය වීඩියෝ පටයක් නිර්මාණය කර සමාජ ගත කළ බවට වරද පිළිගත් එම යුවලට රුපියල් 10,800ක දඩයක් සහ මාස තුනක සිරදඩුවමක් නියම කළ බලංගොඩ මහේස්ත්රාත් ජයරුවන් දිසානායක මහතා එම සිර දඬුවම, වසර හතකට අත්හිටවනු ලැබුවා.
මෙම වීඩියෝ පටය සහ ඊට අදාල දර්ශන සමාජ මාධ්ය ජාලා ඔස්සේ මේ දිනවල සංසරණය වූ බවත් දරුවන් ඔන්ලයින් අධ්යාපනයට යොමුව ඇති වකවානුවක මෙම දර්ශන නැරඹීමට යොමුවුවහොත් එය ඛේදජනක බවත් ශ්රී ජයවර්ධනපුර ජයසේකරාරාමයේ දම්සක් පදනම නම් සංවිධානයක සභාපති පස්සරමුල්ලේ දයාවංශ හිමියන් විසින් ජනාධිපති ගෝඨාභය රාජපක්ෂ මහතා වෙත මින්පෙර යොමුකළ ලිපියක දැක්වුණා.
ඉන් අනතුරුව ක්රියාතක වූ අපරාධ පරීක්ෂණ දෙපාර්තමේන්තුව මෙම මහරගම පමුණුවේ පදිංචි 34 හැවිරිදි ඡායාරූප ශිල්පියා සහ ඇල්පිටිය ප්රදේශයේ 25 හැවිරිදි රූපලාවන්ය ශිල්පිනිය අත්අඩංගුවට ගෙන ඔවුන් 1983 අංක 22 දරන අසභ්ය ප්රකාශන පනත සහ ලංකා දණ්ඩ නිති සංග්රහයේ 285, 286 වගන්ති ප්රකාරව අසභ්ය දර්ශන නිෂ්පාදනය, සන්තකයේ තබා ගැනීම, බෙදාහැරීම සිදුකරමින් වරදක් සිදුකර ඇතැයි අධිකරණයට කරුණු ඉදිරිපත් කරනු ලැබුවා.