සෑම සමාගමක් සිය නිෂ්පාදන වලින් සියයට 10ක ප්‍රමාණයක් අපනයනය කිරීමට උත්සහ කළ යුතු බව පාකිස්ථානයේ මුදල් අමාත්‍ය මිෆ්තා ඉස්මයිල් පවසයි.
දැඩි මුල්‍ය හිඟයකට ලක්ව සිටින පාකිස්ථානයට සිය විදේශ විනිමය අවශ්‍යතාවය සපුරා ගැනීම සඳහා මෙම ක්‍රමය අනුගමනය කළ යුතුව ඇති බව ද මුදල් අමාත්‍යවරයා ඉස්ලාමාබාද් හි පැවති දේශීය ව්‍යාපාරික සමුළුවක් අමතමින් ප්‍රකාශ කර ඇත.
“දේශීය සමාගම් විසින් අපනයනය සඳහා කටයුතු සුදානම් කරන්නේ නම් ඊට අවශ්‍ය පහසුකම් සැලසීම සඳහා සෑම සහයෝගයක්ම ලබා දීමට රජය කැපවී සිටින” බව ද මෙහිදී අමාත්‍යවරයා සඳහන් කර තිබේ.
අපනයන වෙළඳපළ ඉලක්ක කරගත් කාර්මිකකරණයකින් තොරව රටට ප්‍රගතියක් ලබා ගැනීමට නොහැකි බවද ඔහු එහිදී සඳහන් කර ඇත.
කෘෂිකාර්මික භූමියක් වන පාකිස්තානයට මේ වසරේ මේ දක්වා වූ කාල සීමාව තුලදී තිරිඟු ටොන් මිලියන 1.1 ක් ආනයනය කිරීමට සිදුව ඇති බව අමාත්‍යවරයා ප්‍රකාශ කළේය.
මේ හේතුවෙන් කෘෂිකාර්මික අංශයේ ගැටලු විසඳීම සඳහා කාර්ය සාධක බලකායක් පිහිටුවා ඇති බව ද ඔහු පවසයි.
