කොවිඩ් 19 මර්දනය කිරීමට ඖෂධීය පැනියක් සොයාගත් බව කියූ නිසා පසුගිය කාලයේ දැඩි ආන්දෝලනයට ලක්වූ කෑගල්ලේ ධම්මික බණ්ඩාර මහතාගේ බාල සොහොයුරා කොවිඩ් 19 වෛරසය ආසාදනය වීමෙන් මියගොස් ඇතැයි වාර්තා වනවා.
මෙලෙස මියගොස් ඇත්තේ කෑගල්ල පොලිස් වසමේ, හෙට්ටිමුල්ල, මාකූර, ගනේගොඩතැන්නේ පදිංචිව සිටි අප්පුකුට්ටි කංකානමලාගේ හීන්බණ්ඩා නමැති 58 හැවිරිදි විවාහක තිදරු පියෙක්.
කොවිඩ් වෛරසය ආසාදනය වී සිටි ඔහු පසුගිය 12 වනදා සිය නිවසේදී ජීවිතක්ෂයට පත්ව තිබෙනවා.
පසුව කෑගල්ල නාගරික රෝහල් හදිසි මරණ පරීක්ෂක රේණුකා සුබෝධනී කළුආරච්චි නිශ්ශංක මහත්මිය හා කෑගල්ල පොලිසියේ විවිධ පැමිණිලි අංශයේ පොලිස් සැරයන් කුමාර පාරඹේ මහතා විසින් වැඩිදුර පරීක්ෂණ සඳහා දේහය කෑගල්ල මහ රෝහලට රැගෙන ගිය බව පවුලේ ඥාතීන් පවසනවා.
අනතුරුව කෑගල්ල මහ රෝහලේදී සිදු කරන ලද රැපිඩ් ඇන්ටිජන් පරීක්ෂණයකින් ඔහුටකොව්ඩ් 19 වෛරසය ආසාදනය වී ඇති බව තහවුරු වී ඇති බවත් පශ්චාත් මරණ පරීක්ෂණයෙන් ඔහු කෝවිඩ් නිව්මෝනියාව හේතුවෙන් මිය ගොස් ඇති බව තහවුරු වී තිබෙනවා.
