බීමත්ව රිය පදවා රත්මලාන ප්‍රදේශයේ දී ත්‍රිරෝද රථයක් අනතුරට ලක්කර පලාගිය පොලිස් කොස්තාපල්වරයාගේ වැඩ තහනම් කළ බව පොලීසිය පවසනවා.
අනතුරට ලක් වූ එම පොලිස් ජීප් රථය සහ ත්‍රීරෝද රථය එකිනෙක ගැටී අනතුරක් සිදුවන ආකාරයත්, අනතුරුව ජීප් රථය නොනවත්වා ධාවනය කරන ආකාරයත් දැක්වෙන වීඩියෝ පටයක් පසුගියදා සමාජ මාධ්‍ය හරහා සංසරණය වුණා.
එම සිදුවීම 2025.01.28 වන දින රත්මලාන ප්‍රදේශයේ සිදු වූ සිදුවීමක් බවත්, එදිනම මේ පිළිබඳව ගල්කිස්ස පොලිස් ස්ථානය මගින් විමර්ශන සිදුකර ජීප් රථය පැදවූ පොලිස් කොස්තාපල් රියදුරා අත්අඩංගුවට ගත් බවයි පොලීසිය පවසන්නේ.
එහිදී ඔහු බීමතින් රිය ධාවනය කර ඇති බවට තහවුරු වී ඇති අතර, සැකකරු ගල්කිස්ස මහේස්ත්‍රාත් අධිකරණයට ඉදිරිපත් කර තිබෙනවා.
මේ පිළිබඳව ගල්කිස්ස පොලීසිය මගින් වැඩිදුර විමර්ශන සිදු කරනු ලබනවා.
