කැබිනට් මණ්ඩලයේ සියලුම සාමාජිකයන් ඉල්ල අස්වී ඇති බව අමාත්‍ය දිනේෂ් ගුණවර්ධන මහතා අද (03) පස්වරුවේ ප්‍රකාශ කළා.
ඔහු සදහන් කළේ අමාත්‍යවරුන්ගේ ඉල්ලා අස්වීමට අදාළ ලිපි අග්‍රාමාත්‍ය මහින්ද රාජපක්ෂ මහතාට ලබාදුන් බවයි.
කෙසේවෙතත් ශ්‍රී ලංකා නීතීඥ සංගමයේ සභාපති ජනාධිපති නීතීඥ සාලිය පීරිස් මහතා පවසන්නේ අමාත්‍යවරුන් සිය ඉල්ලා අස්වීමේ ලිපි භාරදී ඇත්තේ අග්‍රාමාත්‍යවරයා හට නම් එය කිසිසේත්ම ඉල්ලා අස්වීමක් නොවන අනීතික ක්‍රියාවක් බවයි.
ආණ්ඩුක්‍රම ව්‍යවස්ථාවට අනුව අමාත්‍යවරයෙකු සිය ඉල්ලා අස්වීමට අදාළ ලිපිය භාරදිය යුත්තේ අගමැතිවරයා වෙත නොව ජනාධිපතිවරයා වෙත බව සාලිය පීරිස් මහතා පෙන්වා දෙනවා.
එබැවින් මේ වන විට ආණ්ඩුව තුළ සිදුවන ක්‍රියාවලිය පිළිබඳව පැහැදිලි කිරීමට ජනාධිපතිවරයාට, අග්‍රාමාත්‍යවරයාට හා අමාත්‍ය මණ්ඩලයට වගකීමක් ඇති බව සාලිය පීරිස් මහතා පවසනවා.
මෙවැනි දේශපාලනික අවිනිශ්චිතභාවයක් රටේ ආර්ථිකයට දැඩිව බලපාන බවත් මේවන විටත් පවත්නා දැඩි ආර්ථික අර්බුදය හමුවේ මෙවැනි අවිනිශ්චිතභාවයක් කිසිසේත්ම දින කිහිපයක් හෝ කල්හැරීම සුදුසු ක්‍රියාමාර්ගයක් නොවන බවත් ඔහු වැඩිදුරටත් සදහන් කරනවා.
