බොහෝ ඉන්ධන හල් ආශ්‍රිතව පෝලිම් දක්නට ලැබුණද රටතුළ කිසිදු ඉන්ධන හිගයක් නොමැති බව ලංකා ඛනිජ තෙල් සංස්ථාවේ සභාපති සුමිත් විජේසිංහ මහතා පවසනවා.
පෝලිම් ඇතිවීමට හේතුව ජනතාව අනවශ්‍ය ලෙස ඉන්ධන ගබඩා කර ගැනීම බවයි ඒ මහතා පෙන්වා දෙන්නේ.
ජනතාව අවශ්‍ය ප්‍රමාණයටත් වඩා ඉන්ධන ලබා ගැනීම හේතුවෙන් ඉන්ධන පිරවුම්හල්වල ඉන්ධන නිකුත් කිරීමේ ප්‍රමාදයක් දක්නට ලැබෙන බවත් තවත් දින කිහිපයක් තුළදී ඉන්ධන පෝලිම් අවසන් වනු ඇති බවත් සභාපතිවරයා පෙන්වා දෙනවා.
ඉන්ධන පෝලිම් ඇතිවීමට තවත් හේතුවක් වී ඇත්තේ IOC ඉන්ධන මිල වැඩිවීමයි. මේ නිසා IOC පාරිභෝගිකයන්ද තෙල් සංස්ථාවේ පිරවුම්හල්වලින් ඉන්ධන ලබා ගැනීමට පැමිණෙන බවද සුමිත් විජේසිංහ මහතා පවසනවා.
ජනතාවගේ අවශ්‍යතාවය සම්පූර්ණ කිරීම සඳහාත් විදුලි නිෂ්පාදන කටයුතු සඳහාත් අවශ්‍ය ඉන්ධන තොග රටතුළ තිබෙන බැවින් අනවශ්‍ය පරිදි ඉන්ධන රැස්කර තබා ගැනීමෙන් වැළකී සිටින්නැයි ඔහු ජනතාවගෙන් ඉල්ලා සිටිනවා.
