රට වසා දැමිය යුතු බවට ඉල්ලීම් ඉදිරිපත් වුවත් එසේ ඉල්ලීම් කරන්නේ ජනතාව නොවන බව වාහන නියාමනය, බස් රථ ප්‍රවාහන සේවා හා දුම්රිය මැදිරි හා මෝටර් රථ කර්මාන්ත රාජ්‍ය අමාත්‍යතුමා සහ ප්‍රජා පොලිස් සේවා රාජ්‍ය අමාත්‍ය දිලුම් අමුණුගම මහතා පවසනවා.
රට වසා දැමීමේ අවශ්‍යතාවය මතු කරන්නේ ජනතාව නොව යම් යම් කණ්ඩායම් බවයි ඇමතිවරයා පෙන්වා දෙන්නේ.
රට වසා තිබෙන විට රට අරින ලෙසත්, රට ඇර තිබෙන විට වසා දමන ලෙසත් ඇතැම් කණ්ඩායම් ඉල්ලීම් කරන්නේ රජය අපහසුතාවයට පත් කිරීමේ අරමුණින් බව රාජ්‍ය අමාත්‍යවරයා පවසනවා. එමෙන්ම, ඇතැම් පුද්ගලයන් රට අරින්නැයි පවසමින් පාරේ නිදාගෙන සිටින ආකාරයද පසුගිය දිනවල දක්නට ලැබුණු බවත් ඔහු සිහිපත් කර සිටිනවා
රට වසා දමන්නේ නම් ඒ පිළිබඳව තීන්දු තීරණය ගනු ලබන්නේ ආණ්ඩුව නොව සෞඛ්‍ය බළධාරීන් බවත්, රට වසා දැමීමේ අවශ්‍යතාවයක් මතු වුවහොත් ඒ සම්බන්ධයෙන් අවශ්‍ය මොහොතේදී බළධාරීන් විසින් එම තීන්දුව ගනු ඇති බවත් ඇමතිවරයා සඳහන් කරනවා.
රාජ්‍ය අමාත්‍යවරයා මෙසේ පැවසුවද වෛද්‍යවරුන්, මහජන සෞඛ්‍ය පරීක්ෂකවරුන් ඇතුළු සෞඛ්‍ය සේවයේ පාර්ශව රැසක් රට වසා දමන්නැයි මේවන විටත් ඉල්ලා තිබෙනවා.
