ඊයේ දිනයේ (24) රජයේ ප්‍රවෘත්ති දෙපාර්තමේන්තුව නිවේදනය කළේ පෙරේදා (24) දිනයේ පමණක් වාර්තා වූ කොවිඩ් මරණ සංඛ්‍යාව 52 ක් බවට සෞඛ්‍ය සේවා අධ්‍යක්ෂ ජනරාල්වරයා තහවුරු කර ඇති බවයි.
ඒ අනුව දින 9 කට පසු යළිත් එක් දිනකදී වාර්තා වන කොවිඩ් මරණ සංඛ්‍යාව 50 සීමාව පසු කළා.
ඊයේ (24) කොළඹදී පැවති ප්‍රවෘත්ති සාකච්ඡාවකට එක්වෙමින් සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා පැවසුවේ පසුගිය දිනවල කොවිඩ් 19 වෛරසය ආසාදිතව මියගොස් තිබුණේ එන්නත් ලබානොගත් පුද්ගලයින් බවයි.
ඒ අනුව කොවිඩ් 19 මර්දන එන්නත ලබාගැනීමේ වැදගත්කම එහිදී සෞඛ්‍ය සේවා අධ්‍යක්ෂ ජනරාල්වරයා පෙන්වා දුන්නා.
පළමු කොවිඩ් රැල්ලෙන් මෙරට මියගිය පුද්ගලයින් සංඛ්‍යාව 13 ක් වන නමුත් දෙවන කොවිඩ් රැල්ල වන විට එම සංඛ්‍යාව 591 දක්වා ඉහළ ගියා.
කෙසේ වෙතත් මේ වන විටත් පවතින තුන්වන රැල්ලේදී කොවිඩ් 19 වෛරසය ආසාදිතව මියගිය පුද්ගලයින් සංඛ්‍යාව 3450 ක් ලෙසයි වාර්තා වන්නේ.
