බලාපොරොත්තු රැසක් සමගින් වත්මන් පාලනය කෙරෙහි ජනතාව තැබූ විශ්වාසය වඩා පළුදු වී ඇත්තේ බලාපොරොත්තු වූ දේවල් නොකරන නිසාම නොව, බලාපොරොත්තු නොවූ දේවල් කරන නිසා බව කර්මාන්ත අමාත්ය විමල් වීරවංශ මහතා පවසනවා.
සිය නිල ෆේස්බුක් පිටුවේ සටහනක් තබමින් අමාත්ය විමල් වීරවංශ මහතා පවසන්නේ දිගින් දිගටම මෙවැනි කරුණු සිදුවෙනවිට ආණ්ඩුව ජනතාව තුළ හටගන්නා අවිශ්වාසය සහ අපේක්ෂාභංගත්වය පරදවමින් ඉක්මනින් විශ්වාසය තහවුරු කළ යුතුව ඇති බවයි.
එමෙන්ම ජනාධිපතිවරයා සක්රීයව දේශපාලනයට මැදිහත් වීම ද ඉතා ඉක්මනින් සිදුකළ යුතුව ඇති බවත් එමගින් බොහෝ ගැටළුවලට විසදුම් ලැබෙනු ඇති බවත් අමාත්යවරයා පෙන්වා දෙනවා.
රටට වැදගත් තීන්දු තීරණ ගනු ලබන කැබිනට් මණ්ඩල පත්රිකා කැබිනට් මණ්ඩලයට එක දිනකින් ගෙනවිත් සම්මත කරගන්නවා වෙනුවට ප්රමාණවත් කාලයක් තුළ ප්රමාණවත් සාකච්ජාවක් කැබිනට් මණ්ඩලය තුළ පවත්වා එම කැබිනට් පත්රිකා සම්මත කරගැනීම වඩා සුදුසු ක්රමය බවද විමල් වීරවංශ මහතා පවසනවා.
එමගින් පසුව වෙනස් නොවන තීරණ ගැනීමට ආණ්ඩුවට හැකියාව ලැබෙනු ඇති බවයි අමාත්යවරයා පෙන්වා දෙන්නේ.
තවද සාමුහිකව තීන්දු තීරණ ගැනීම වෙනුවෙන් පක්ෂ නායක රැස්වීම් වැනි රැස්වීම් සදහා ද ජනාධිපතිවරයා සහභාගී වීම අතිශය වැදගත් බවද විමල් වීරවංශ මහතා සදහන් කරනවා.