ජාතික ජන බලවේගයේ නායක අනුර කුමාර දිසානායක මහතා ජනපති වීමේ සතුට සමරා රතිඤ්ඤා දල්වමින් සිටි පුද්ගලයකු බරපතල තුවාල ලබා රෝහල් ගත කර ඇතැයි හොරණ මූලස්ථාන පොලිසිය පවසනවා.
හොරණ ඉලිබ කොස්වත්ත ප්‍රදේශයේ පදිංචි 28 හැවිරිදි පුද්ගලයකු එලෙස පිළිස්සුම් තුවාල ලබා තිබෙනවා.
තුවාල ලද පුද්ගලයා රතිඤ්ඤාවක් ගිනි දල්වා මදක් ඈතට විසිකර ඇති අතර එය පිපිරී නොයාම හේතුවෙන් ඒ අසලට ගොස් පරීක්ෂා කිරීමේදී එකවරම ඇතිවූ පිපිරීමත් සමඟම ඔහුගේ දකුණු අතේ මැණික් කටුව අසලට, උදර ප්‍රදේශයට ඇතුළු ශරීරයේ ස්ථාන කීපයකටම දැඩි පිළිස්සුම් තුවාල ලබා ඇතැයි වාර්තා වනවා.
ඔහු ශල්‍යකර්මයකට ලක් කිරීමට නියමිතව ඇතැයි වාර්තා වන අතර, සිද්ධිය සම්බන්ධයෙන් හොරණ පොලිසිය මූලස්ථානය වැඩිදුර විමර්ශන සිදු කරමින් පවතිනවා.
