මන්නාරම සුළං විදුලි ව්‍යාපෘතියට එරෙහිව පෙත්සමක්

මන්නාරම සුළං විදුලි ව්‍යාපෘතියට එරෙහිව මන්නාරම රදගුරු හිමිවරුන් සහ පරිසරවේදීන් විසින් ශ්‍රේෂ්ඨාධිකරණයට ඊයේ (11) මූලික අයිතිවාසිකම් පෙත්සමක් ගොනු කර තිබෙනවා.

ඒ පරිසරවේදී රොහාන් පෙතියගොඩ, මහාචාර්ය නිමල් ගුණතිලක, මහාචාර්ය සරත් කොටගම යන මහත්වරුන් සහ මන්නාරම රදගුරු එමානුවෙල් ප්‍රනාන්දු පියතුමන් විසින් මහාධිකරණයට මෙම මූලික අයිතිවාසිකම් පෙත්සමක් ගොනු කර තිබුණා.

එය ගොනු කර ඇත්තේ මන්නාරමේ ඉදිකිරීමට යෝජිත මෙගාවොට් 250ක සුළං බල ව්‍යාපෘතියක් වන අතර එය Adani Green Energy Private Limited හෝ Adani Green Energy SL Limited වෙත ලබා දීමට එරෙහිවයි.

එම පෙත්සමේ විත්තිකරුවන් ලෙස අමාත්‍යවරුන්, ශ්‍රී ලංකා සුනිත්‍ය බලශක්ති අධිකාරිය, මධ්‍යම පරිසර අධිකාරිය, ආයෝජන මණ්ඩලය, ශ්‍රී ලංකා විදුලිබල මණ්ඩලය, මහජන උපයෝගිතා කොමිෂන් සභාව ඇතුළු 67 දෙනෙකු නම් කර තිබෙනවා.

මෙම ව්‍යාපෘතියේ පාරිසරික බලපෑම පිළිබඳ තක්සේරුවේ විශ්වසනීයත්වය සහ ශ්‍රී ලංකා සුනිත්‍ය බලශක්ති අධිකාරියේ ක්‍රියාකලාපය ක්‍රියාත්මක කිරීමේ ගැටලුවක් නිර්මාණය කර ඇති බව පෙත්සම්කරුවන් විසින් පෙන්වා දි තිබෙනවා.

මීට පෙර ප්‍රකාශ කර තිබුණේ, යෝජිත සුළං විදුලි උත්පාදන ව්‍යාපෘතිය රජයන් දෙකක එකඟතාවක් මත සිදු කෙරෙන බවයි.

නමුත් ඒ පිළිබඳවද මෙහිදී ප්‍රශ්නයක් මතුව තිබෙනවා.

මෙම විදුලි උත්පාදන ව්‍යාපෘතියෙන් වසර 20කට නිෂ්පාදනය කරන ලද කිලෝවොට් පැයක විදුලිය අමෙරිකානු ඩොලර් 802.6ක පදනම මත මිලදී ගැනීමට ගත් තීරණය සම්බන්ධයෙන් ද පෙත්සම්කරුවන් අධිකරණයේ අවධානයට යොමු කර තිබෙනවා.

ජාතික අවශ්‍යතා ආරක්ෂා කිරීම, පරිසරය, වෘක්ෂලතා, සත්ත්ව, මහජන මුදල් ඇතුළු රාජ්‍ය දේපළ ආරක්ෂා කිරීම, ශ්‍රී ලංකාවේ සාමාන්‍ය ජනතාවගේ සහ අනාගත පරපුරේ අයිතිවාසිකම් සහ ස්වාධීනත්වය ආරක්ෂා කිරීම සඳහා මෙම නඩුව පවරා ඇති බව පෙත්සමේ සඳහන්.