හිටපු අමාත්‍ය මංගල සමරවීර මහතාගේ පෞද්ගලික ආරක්ෂක නිලධාරියෙකුගේ නිවසේ තිබූ මිලිමීටර් නවය වර්ගයේ පිස්තෝලයක් ඊයේ මාතර කොට්ඨාශ කාන්තා හා ළමා කාර්යාංශයේ නිලධාරීන් විසින් අත්අඩංගුවට ගෙන තිබෙනවා.
මෙම පුද්ගලික ආරක්ෂකයා මීට පෙර හිටපු ජනාධිපති චන්ද්‍රිකා කුමාරතුංග මහත්මියගේ ආරක්ෂාවට අනුයුක්තව සිට ඇති බව සඳහන් වනවා.
2002 වසරෙන් පසු පොලිස් සේවයෙන් විශ්‍රාම ගෙන පුද්ගලික ආරක්ෂකයකු ලෙස මංගල සමරවීර මහතා සමගද ඔහු කටයුතු කර තිබෙනවා.
අදාළ ආරක්ෂක අංශ නිලධාරියා මීට වසර කිහිපයකට පෙර හදිසි අනතුරක් හේතුවෙන් ජීවිතක්ෂයට පත්ව ඇති අතර, ඔහු විසින් භාවිතා කළ බවට සැලකෙන ගිනි අවියක් ඔහුගේ නිවසේ ඇති බවට පොලිසියට ලද තොරතුරු අනුව විමර්ශනය සිදු කර තිබුණා.
එම ස්ථානයේ තිබී මිලිමීටර් නවය වර්ගයෙන් පිස්තෝලයක්, ඒ සඳහා යොදන ජීව උන්ඩ 12ක් සහ මැගසිනයක් පොලිස් භාරයට ගෙන තිබෙනවා.
