අග්‍රාමාත්‍ය මහින්ද රාජපක්ෂ මහතා සිය ධුරයෙන් ඉල්ලා අස්විය යුතු නැතැයි ශ්‍රී ලංකා පොදුජන පෙරමුණේ
ප්‍රාදේශීය සභා සභාපතිවරු සහ නගරාධිපතිවරු ඒකමතිකව තීන්දු කළ බව අග්‍රාමාත්‍ය මාධ්‍ය ඒකකය නිවේදන කරනවා.
ඒ අග්‍රාමාත්‍යවරයා සමඟ අරලියගහ මන්දිරයේ දී අද (27) දින පැවැති හමුවේදී.
මහින්ද රාජපක්ෂ මහතා බහුතර බලයක් සහිතව මහජන ඡන්දයෙන් පිහිටවූ ආණ්ඩුවේ අග්‍රාමාත්‍යවරයා බවත් ජනතා පරිමාධිපත්‍යට හිස නමන්නේ නම් අග්‍රාමාත්‍යවරයා එම ධුරයේ අඛණ්ඩව කටයුතු කළ යුතු බවත් මෙහිදී ප්‍රාදේශීය සභා සභාපතිවරු සහ නගරාධිපතිවරු ඒකමතිකව පවසා සිටි බවයි අග්‍රාමාත්‍ය මාධ්‍ය ඒකකය සදහන් කරන්නේ.
ඒ අනුව අදාළ තීන්දුව ජනාධිපති ගෝඨාභය රාජපක්ෂ මහතා හමුවී දැනුම් දීමටද ප්‍රාදේශීය සභා සභාපතිවරු සහ නගරාධිපතිවරු මෙහිදී තීන්දු කර තිබෙනවා.
මහින්ද රාජපක්ෂ නාමය හා ප්‍රතිරූපය භාවිත කරමින් පාර්ලිමේන්තුවට පැමිණි ආණ්ඩු පක්ෂ මන්ත්‍රීවරුන්ට අග්‍රාමාත්‍යවරයා ආරක්ෂා කිරීමේ වගකීමක් මෙන්ම යුතුකමක් ද ඇතැයි කී පළාත් පාලන ආයතන ප්‍රධානීහු රටේ ආර්ථික අර්බුදයක් නිර්මාණය වී ඇති මෙවන් මොහොතක ආණ්ඩුව අස්ථාවර කර ස්වාධීනවීමට කිසියම් මන්ත්‍රීවරයකුට සදාචාරාත්මක අයිතියක් නැති බවද පවසා තිබෙනවා.
එසේ ස්වාධීන වීමට ආණ්ඩුවේ කිසියම් මන්ත්‍රී පිරිසක් ක්‍රියා කරන්නේ නම් බිම් මට්ටමේ ජනතාව ඔවුන්ට ප්‍රතිචාර දැක්වීමට සූදානම්ව සිටින බව සිහි තබාගත යුතු යැයි ද ප්‍රාදේශීය සභා සභාපතිවරු සහ නගරාධිපතිවරු කියා මෙහිදී සදහන් කළ බව අදාළ නිවේදනයේ සදහන්.
