මත්ද්‍රව්‍ය නාශක කාර්යාංශයේ නිලධාරීන් පිරිසක් මත්ද්‍රව්‍ය ජාවාරමේ නිරත වූයේ යැයි කියන සිද්ධිය සම්බන්ධයට බවට සැකපිට රක්ෂිත බන්ධනාගාර ගත කර සිටි සංවිධානාත්මක අපරාධ කල්ලි සාමාජික ජනිත් මධුශංක හෙවත් “පොඩි ලැසී” නැමැත්තා ලබන 18 වන දින තෙක් තවදුරටත් රක්ෂිත බන්ධනාගාරගත කිරීමට කොළඹ ප්‍රධාන මහේස්ත්‍රාත් බුද්ධික සී රාගල මහතා ඊයේ (04) නියෝග කළා.
සැකකරු මේ වන විට බූස්ස බන්ධනාගාරයේ රදවා ඇති අතර සිදුකරමින් පවතින විමර්ශන සම්බන්ධයෙන් අපරාධ පරීක්ෂණ දෙපාර්තමේන්තුව අධිකරණයට කළ කරුණු දැක්වීම් සළකා බැලු මහේස්ත්‍රාත්වරයා මෙම නියෝගය නිකුත් කරනු ලැබුවා.
පොලිස් මත්ද්‍රවය නාශක කාර්යංශයට අනියුක්ත නිලධාරීන් කණ්ඩායමක් මෙරට මහා පරිමාණ මත්ද්‍රව්‍ය ජාවාරම්කරුවන් සමග සම්බන්ධ වෙමින් මත්ද්‍රව්‍ය ජාවාරමේ නිරතවීම, සංවිධානාත්මක අපරාධ කණ්ඩායම් සමග එක්වී අවි යුධ රැස් කිරීම, මනුෂ්‍ය ඝාතනයන් කිරීමට ආධාර අනුබල දීම, සැලසුම් කිරීම, කුමන්ත්‍රණය කිරීම, සහාසික ක්‍රියා සිදු කරමින් මහජන සාමයට උපද්‍රව කිරීම හා සාමාන්‍ය ජන ජීවිතය කඩාකප්පල් කිරීම සම්බන්ධයෙන් අපරාධ පරීක්ෂණ දෙපාර්තමේන්තුව විසින් මෙම විමර්ශනය ආරම්භ කර තිබෙනවා.
ඒ අනුව වසරකට අසන්න කාලයක් අපරාධ පරීක්ෂණ දෙපාර්තමේන්තුව භාරයේ රැඳවුම් නියෝග මත සිටි පොඩි ලැසි පසුගිය දෙසැම්බර් මස 15 වන දින මෙම සිද්ධිය සම්බන්ධයෙන් සැකකරුවෙකු ලෙස නම් කර අපරාධ පරීක්ෂණ දෙපාර්තමේන්තුව අධිකරණයට ඉදිරිපත් කිරීමෙන් පසු මුල්වරට රක්ෂිත බන්ධනාගාර ගත කරනු ලැබුවා.
