ජුලි 09 වනදා පැවති මහජන විරෝධතාවයේදී කොටුව ජනාධිපති නිල නිවසේ තිබූ බියර් වීදුරුවක් එකක් සොරකම් කිරීමේ චෝදනාව මත පුද්ගලයෙකු අත්අඩංගුවට ගෙන තිබෙනවා.
සැකකරු 46 හැවිරිදි රංගම ප්‍රදේශයේ පදිංචිකරුවෙකු වන අතර ඔහු පෑස්සුම් කර්මාන්තයේ නිරත වන පුද්ගලයෙක්.
මෙම පුද්ගලයාව කුරුණෑගල ප්‍රදේශයේදී වැල්ලව පොලිසිය විසින් අත්අඩංගුවට ගෙන තිබෙනවා..
සැකකරු තවත් මිතුරන් දෙදෙනකු සමඟ ජුලි 09 වැනිදා ගාලුමුවදොර විරෝධතාවයට සහභාගී වී ඇති අතර අනතුරුව ජනාධිපතිවරයාගේ නිවසේ තිබූ බියර් බෝතලයක්ද එම පිරිස සන්තකයට ගෙන එම පරිශ්‍රයේ තිබී සොයාගත් බියර් වීදුරු භාවිත කර මත්පැන් පානය කර ඇති බවයි පොලීසිය පවසන්නේ.
පසුව ඔහු ගෝඨාභය රාජපක්ෂ සිහිවීම සඳහා අදාළ බියර් වීදුරුව නැවතත් සිය නිවස වෙත රැගෙන ගොස් තිබෙනවා.
මෙම පුද්ගලයා ජනාධිපතිවරයාගේ නිවසේ මිතුරන් සමඟ බියර් මග් එක සමඟ ගත් ඡායාරූපයක් ඔහුගේ පෞද්ගලික ෆේස්බුක් ගිණුමේ පලකර ඇති බවද පොලීසිය පවසනවා.
ජනාධිපතිවරයාගේ නිවසට නීතිවිරෝධී ලෙස ඇතුළුවීම සහ නීතිවිරෝධී ලෙස භාණ්ඩ සන්තකයේ තබාගැනීම සම්බන්ධයෙන් සැකකරුට චෝදනා එල්ල වී ඇති අතර, අදාළ බියර් වීදුරුව මේ වන විට පොලිස් භාරයට ගෙන තිබෙනවා.
කෙසේවෙතත් ගෝඨාභය රාජපක්ෂ මහතා මත්පැන් හෝ මස් මාංශ අනුභව නොකරන පුද්ගලයෙක් බවයි ජනාධිපතිවරණයට පෙර සිටම ප්‍රචාරය කෙරුණේ.
එවන් තත්ත්වයක් තුළ ජනාධිපති මන්දිරය තුළ බියර් බෝතල් රැස්කර තිබීම උභතෝකෝටික තත්ත්වයක් වනවා.
