පහන්තුඩාව දියඇල්ල අසළ අසභ්‍ය වීඩියෝ දර්ශනයේ සිටින යුවල අද (02) පස්වරුවේ අපරාධ පරීක්ෂණ දෙපාර්තමේන්තුවේ සමාජ ජාලා විමර්ශන ඒකකය විසින් අත්අඩංගුවට ගෙන තිබෙනවා.
අත්අඩංගුවට ගත් තරුණිය ඇල්පිටිය ප්‍රදේශයේ පදිංචි 25 හැවිරිදි අයෙක් වන අතර ඇය පන්නිපිටිය ප්‍රදේශයේ තාවකාලිකව නවාතැන් ගෙන සිට ඇති බවටයි වාර්තා වන්නේ.
එමෙන්ම අදාළ දර්ශනවල සිටන තරුණයා 34 හැවිරිදි පුද්ගලයෙක් වන අතර ඔහු මහරගම ප්‍රදේශයේ පදිංචිකරුවෙක් වනවා.
මෙම යුවළ අත්අඩංගුවට ගෙන ඇත්තේ අසභ්‍ය වීඩියෝපට නිෂ්පාදනය කිරීමේ චෝදනාව මතයි.
එමෙන්ම, අදාල වීඩියෝ පටය ළඟ තබා ගැනීම හා පුද්ගලයින් අතර බෙදා හැරීම තහනම් බවත් එය ශ්‍රී ලංකාවේ නීතිය යටතේ දඩුවම් ලැබිය හැකි අපරාධමය වරදක් බවත් ශ්‍රී ලංකා පොලිසිය දැනුම් දී සිටිනවා.
මෙම වීඩියෝ පටය සහ ඊට අදාල දර්ශන සමාජ මාධ්‍ය ජාලා ඔස්සේ මේ දිනවල සංසරණය වූ බවත් දරුවන් ඔන්ලයින් අධ්‍යාපනයට යොමුව ඇති වකවානුවක මෙම දර්ශන නැරඹීමට යොමුවුවහොත් එය ඛේදජනක බවත් ශ්‍රී ජයවර්ධනපුර ජයසේකරාරාමය විසින් ජනාධිපති ගෝඨාභය රාජපක්ෂ මහතා වෙත මින්පෙර යොමුකළ ලිපියක දැක්වුණා.
