ජලය එක්රැස්වන අයුරින් පරිසරය අපවිත්‍රව පවත්වාගෙන යන ස්ථානවල මදුරු කීටයින් සිටීදැයි සොයා ගැනීම සඳහා ශ්‍රී ලංකා පොලීසියේ නිල සුනඛයින් පුහුණුකිරීම සාර්ථක වූ බව පොලිස් මාධ්‍ය ප්‍රකාශක, ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා පවසයි.
ඒ සඳහා පොලිස් නිල සුනඛයින්ට විශේෂ පුහුණුවක් ලබාදී ඇති බවයි පොලිස් මාධ්‍ය ප්‍රකාශකවරයා සඳහන් කරන්නේ.
ඒ අනුව පරිසර පොලිස් නිලධාරීන් සිදුකරන විවිධ වැටලීම් සහ පරීක්ෂා කිරීම්වලදී එම නිල සුනඛයින් දෙදෙනාගේ සහාය ලබාගැනීමට නියමිත වනවා.
ශ්‍රී ලංකා පොලිසීය සතුව නිල සුනඛයින් 200කට ආසන්න සංඛ්‍යාවක් සිටින බවත් ඔවුන් විවිධ වූ පොලිස් මෙහෙයුම් සඳහා සාර්ථකව සහාය දක්වන බවත් මාධ්‍ය ප්‍රකාශකවරයා වැඩිදුරටත් පවසනවා.
