ඊයේ (19) දිනයේ රඹුක්කන ප්‍රදේශයේ පැවති මහජන උද්ඝෝෂණයකට පොලිසිය විසින් වෙඩිතබනු ලැබුවේ පොලිස් ආඥාපනත අනුකූලව බව මහජන ආරක්ෂක අමාත්‍ය ප්‍රසන්න රණතුංග මහතා පවසනවා.
ඒ, අද දින පාර්ලිමේන්තුව අමතමින්.
පොලිසියට ඒ සඳහා අවශ්‍ය බලය ඇති බවයි ඔහු පවසන්නේ.
ඉන්ධන ලීටර් 33,000ක් සහිත තෙල් බවුසරයක් ගිනිතැබීමට උද්ඝෝෂකයින් උත්සාහ කළ බව පැවසූ අමාත්‍යවරයා එය සිදුවුණේ නම් අද වන විට රඹුක්කනක් ඉතිරි නොවන බවත් පවසනවා.
එමෙන්ම පසුගිය දිනවල රටේ පැවති උද්ඝෝෂණවලට බස් රථවලින් සෙනඟ අද්දවමින් ඒවා උත්සන්න කරවීමට සමගි ජන බලවේගය ප්‍රමුඛ විපක්ෂය කටයුතු කළ බවටත් අමාත්‍යවරයා එහිදී චෝදනා කර සිටියා.
අමාත්‍යවරයා මෙම ප්‍රකාශය සිදුකළේ විපක්ෂ මන්ත්‍රීවරුන්ගේ දැඩි විරෝධය මධ්‍යයේ වන අතර එහිදී ඔවුන් අමාත්‍යවරයාට “මිනීමරුවා” යැයි කියමින් විරෝධය පළකරනු දක්නට ලැබිණි.
