කියුබානු යූ ටියුබ් තරුවක් ලෙස සැලකෙන ඩීනා ෆර්ඩිනෑන්ඩ්ස් පසු ගිය දා සපාඤ්ඤ රූපවාහිනී නාළිකාවක් වෙත සජීවී ප්‍රකාශයක් ලබා දෙමින් සිටි අතරතුර කියුබානු ආරක්ෂක අංශයන් විසින් අත් අඩංගුවට ගනු ලැබුවා.
ඇය එම අවස්ථාවේ අදාළ නාළිකාව සමඟ සම්බන්ධ වී රජයට එරෙහි විරෝධතා පිළිබඳ ප්‍රකාශක් ලබා දී තිබෙනවා.
ඇය කියුබානු යූ ටියුබ් පරිශීලකයන් අතර ජනප්‍රිය වී සිටින්නේ ඩීනා ස්ටාර්ස් යනුවෙන් ය.
සජීවී වැඩසටහන අතරතුර ඇය අත්අඩංගුවට ගැණුනු අතර “ආරක්ෂක හමුදා පිටත සිටිනවා. මා හට යාමට සිදු වෙනවා” යැයි පවසමින් ෆර්ඩිනෑන්ඩ්ස් සජීවී විකාශය අතරතුර නැගිට ගොස් තිබෙනවා.
වැඩසටහන මෙහෙයවමින් සිටි නිවේදිකාව ඔවුන් ඔබ අත් අඩංගුවට ගත්තා දැයි ඇගෙන් විමසා සිටියත් ඇය පැවසුවේ ඔවුන් කිසිවක් ප්‍රකාශ නොකළ බවයි.
ඔබ යන්නේ තනිවමද යනුවෙන් නිවේදිකාව ඇසූ විට ඇය “ඔව්, නමුත් මගේ මිතුරන් මා පසුපස ඒවි” යැයි ඩීනා හදිසියෙන් පවසා ඇය එම ස්ථානයෙන් ඉවත්ව ගොස් තිබෙනවා.
පසුව ඇය ඉන්ස්ටග්‍රෑම් ඔස්සේ වීඩියෝවක් පළ කරමින් ඇය නිදහස් කළ බවත් ඇයට කිසිදු හිරිහැරයක් සිදු නොවූ බවත් පැවසුවා.
එමෙන්ම ව්‍යාජ ප්‍රවෘත්ති ප්‍රචාරය නොකරන්නැ යි ද ඇය එහිදී ඉල්ලා තිබෙනවා.
කෙසේ වෙතත් මේ පිළිබඳ CNN නාළිකාව කියුබානු බලධාරීන්ගෙන් විමසා සිටිය ද ඔවුන්තවමත් සිදුවීම සම්බන්ධයෙන් කිසිදු ප්‍රතිචාරයක් දක්වා නැහැ.
කියුබානු රජයට එරෙහිව පසු ගිය දා විරෝධතා මාලාවක් ඇති වුණු අතර ඒ සම්බන්ධයෙන් සමාජ ක්‍රියාකාරීන් මාධ්‍යවේදීන් ඇතුළු බොහෝ පිරිසක් අත්අඩංගුවට පත් වී ඇති බවත් තවත් අය අතුරුදන් වී ඇති බවත් වාර්තා වුණා.
