විදුලිය විසන්ධි කිරිම් වැඩිවෙලා

රටේ විදුලිය විසන්ධි කිරීම් ඉතා බරපතළ ආකාරයට සිදුව ඇති බව විදුලිය පාවිච්චි කරන්නන්ගේ සංගමය පවසනවා.

2024 වසරේ ජනවාරි සිට ජුනි මාසය දක්වා විදුලිය විසන්ධි කිරීම් සිඝ්‍රයෙන් වැඩි වී ඇති බව විදුලිය පාවිච්චි කරන්නන්ගේ සංගමයේ ජාතික ලේකම් සංජීව ධම්මික මහතා සඳහන් කරනවා.

ලංකා විදුලි බල මණ්ඩලයේ දත්ත අනුව කරුණු පැහැදිලි කරන සංජීව ධම්මික මහතා කියා සිටින්නේ, 2023 වසරේ කලට වෙලාවට මුදල් නොගෙවීම නිසා විදුලිය විසන්ධි කිරීම් 970,933 සිදුව ඇති බවයි.

මේ වසරේ ජනවාරි සිට ජුනි මාසය දක්වා විදුලිය විසන්ධි කිරීම් 628,286ක් සිදුකර ඇති අතර නිවාස 505,949 කර්මාන්තශාලා 8,579ද ආගමික ස්ථාන 2,090ද හෝටල් නිකේතන 39ද රාජ්‍ය අංශයේ ආයතන 359ද කඩ සාප්පු හා වෙනත් 111,276ද ඒ අතර වන බව ද ඔහු පෙන්වා දෙනවා.

ඒ අනුව, ගිය වසරේ එක් දිනකට විදුලිය විසන්ධි කිරීම් 2,660 වූ අතර මේ වසරේ එක් දිනකට විදුලිය විසන්ධි වීමේ සාමාන්‍ය අගය 3,443 බව ඔහු සඳහන් කළා.

වැඩිදුරටත් අදහස් දක්වමින් ඔහු කියා සිටින්නේ, විදුලිබල මණ්ඩලයේ දත්තවල සාවද්‍ය භාවය හමුවේ වැඩි වූ විදුලි බිල නිසා පසුගිය මාසවල බිල්පත් දිගින් දිගට එකතු වීම හමුවේ අසරණ වූ ජනතාවට මේ වසරේ මේ තත්ත්වය හටගෙන ඇති බවයි.

විදුලි පනත උල්ලංඝණය කරමින් අධික ලාභ ලැබූ විදුලිබල මණ්ඩලයට මෙම බිල්පත් ගෙවීමට පාරිභෝගිකයන්ට කනකර උකස් කරන්නට පවා සිදු වු බවද ඒ මහතා පවසනවා.