රාජ්‍ය කඨින මහෝත්සවය සහ පඬු පෙවීමේ මහා මංගල්‍යය ජනාධිපති ගෝඨාභය රාජපක්ෂ මැතිතුමාගේ ප්‍රධානත්වයෙන් අද (14) පෙරවරුවේ කුරුණෑගල කොළඹගම ශ්‍රී මියුගුණාරාම රජමහා විහාරස්ථානයේදී පැවැත්වුණා.
ජනාධිපති මාධ්‍ය අංශය නිවේදනය කරන්නේ දෙවැනි පරාක්‍රමබාහු රජ සමයෙන් පසු රාජ්‍ය අනුග්‍රහයෙන් කඨින මහෝත්සවයක් පැවැත්වුණු දෙවන අවස්ථාව මෙය බවයි.
අග්‍රාමාත්‍ය මහින්ද රාජපක්ෂ මැතිතුමාගේ උපදෙස් පරිදි බතික්, අත් යන්ත්‍ර රෙදි හා දේශීය ඇඟලුම් නිෂ්පාදන රාජ්‍ය අමාත්‍යාංශය සංවිධාන කළ කඨින චීවර පූජා මහෝත්සවයට පැමිණි ජනාධිපති ගෝඨාභය රාජපක්ෂ මහතා ප්‍රථමයෙන් ශ්‍රී මියුගුණාරාම රජමහා විහාරාධිකාරී පූජ්‍ය ගල්ලැහැපිටියේ පේමරතන හිමියන් බැහදැක උන්වහන්සේගේ සුවදුක් විමසුවා.
කඨින චීවරය පඬු පෙවීම, පඬු ගල්වනයට ඖෂධ එක් කිරීම හා පඬු බඳුන සඟ සතු කොට පූජා කිරීම රාජ්‍ය අමාත්‍ය දයාසිරි ජයසේකර මහතා විසින් සිදු කරනු ලැබුවා.
පඬු පෙවූ කඨින චීවරය ජනාධිපති ගෝඨභය රාජපක්ෂ මැතිතුමා විසින් පෙරහරින් වැඩම කරවා සඟ සතු කොට පූජා කළා.
“සෞභාග්‍යයේ දැක්ම” ප්‍රතිපත්ති ප්‍රකාශනයේ සඳහන් “බුදුපුත් මාපිය හරසර” ජාතික වැඩපිළිවෙළේ සමාරම්භය සනිටුහන් කරමින්, සම්බුදු සසුනට කුල දරුවන් පූජා කළ දෙමව්පියන් හයදෙනෙකුට හැඳුනුම්පත් ලබා දීමද මෙහිදී ජනාධිපති ගෝඨාභය රාජපක්ෂ මහතා අතින් සිදු කෙරුණා.
කෙසේ වෙතත් මෙම අවස්ථාවට දහස් ගණනින් සෙනඟ රැස්කර තිබූ අතර ඔවුන් කිසිදු කොවිඩ් මාර්ගෝපදේශයක් අනුගමනය කරන ආකාරයක් දක්නට නොලැබීම විශේෂත්වයක්.
එකිනෙකා පොරකමින් ජනාධිපතිවරයා අතගැස්වීමට රැගෙන එන කඨින චීවරයට අත තැබීමට ජනතාව පොරකන ආකාරය ජනාධිපති මාධ්‍ය අංශය නිකුත් කළ ඡායාරූප හා වීඩියෝවල දකින්නට ලැබෙනවා.
සෞඛ්‍ය සේවා අධ්‍යක්ෂ ජනරාල්වරයා අවසාන වරට නිකුත් කර ඇති සෞඛ්‍ය මාර්ගෝපදේශවලට අනුව තවදුරටත් පන්සල්, පල්ලි, කොවිල් වැනි පූජනීය ස්ථානවල සාමූහික ක්‍රියාකාරකම් හෝ රැස්වීම් පැවැත්වීමට අවසර ලබාදී නැහැ.
