බත් පැකට්ටුවක, කොත්තුවක, ෆ්‍රයිඩ් රයිස් එකක සහ කිරි තේ එකක මිල රුපියල් 10 කින් ඉහළ දැමූ බව සමස්ත ලංකා ආපනශාලා හිමියන්ගේ සංගමය පවසනවා.
එම සංගමයේ සභාපති අසේල සම්පත් මහතා පවසන්නේ ගෑස් හා කිරිපිටි මිල ඉහළ දැමීම හේතුවෙන් මෙම තීරණය ගත් බවයි.
මේ වන විට එක් දිනක් තුළ භාණ්ඩ රැසක මිල ගණන් විශාල වශයෙන් ඉහළ යෑම හේතුවෙන් පාරිභෝගික ජනතාව දැඩිලෙස පීඩාවට පත්ව සිටිනවා.
පවත්නා කොවිඩ් වසංගත තත්ත්වය හේතුවෙන් බොහෝ දෙනෙකුට තමන්ගේ එදිනෙදා රැකියා මෙන්ම ස්වයං රැකියා අහිමිව ඇති පරිසරයක් තුළ භාණ්ඩ මිල අසාමාන්‍ය ලෙස ඉහළ යෑම හේතුවෙන් ජනතාව තව තවත් අපහසුතාවයට පත්වන බවයි විපක්ෂය චෝදනා කරන්නේ.
මේ වන විට ශ්‍රී ලංකා මහබැංකුවද විශාල වශයෙන් මුදල් අච්චු ගසමින් සිටින නමුත් පසුගියදා නව මහබැංකු අධිපති අජිත් නිවාඩ් කබ්රාල් මහතා පැවසුවේ එලෙස මුදල් අච්චු ගැසුවද එයින් උද්දමනකාරී බලපෑමක් ඇති නොවන බවයි.
