ජනප්‍රිය ප්‍රධාන පාසලක පාසල් සිසුන් බරපතල ලිංගික අපයෝජනයට ලක්කළ විදුහල්පතිවරයෙක්ව ජාතික ළමා ආරක්ෂක අධිකාරිය විසින් අත්අඩංගුවට ගනු ලැබුවා.
ඒ, රත්නපුර ප්‍රධාන පිරිමි පාසලක කලක පටන් සිදුවන ළමා ලිංගික අපයෝජනයන් පිළිබඳව ජාතික ළමා ආරක්ෂක අධිකාරියට ලැබුණු තොරතුරක් මත සිදුකළ විශේෂ විමර්ශනයකින් අනතුරුවයි.
එම විමර්ශනවලදී හෙළිවී ඇත්තේ මෙම විදුහල්පතිවරයා දීර්ඝ කාලයක සිට ඉතා සූක්ෂමව පාසලේ ළමයින් සිය නිල නිවාසය වෙත ගෙන්වාගෙන මුදල් ත්‍යාග සහ විවිධ වරප්‍රසාද ලබාදෙමින් ලිංගික අපයෝජනයන් සිදුකර ඇති බව සාක්ෂි සහිතව කරුණු අනාවරණය වී තිබෙන බව‍යි ජාතික ළමා ආරක්ෂක අධිකාරිය පවසන්නේ.
ඊයේ (23) අත්අඩංගුවට ගත් සැකකරු රත්නපුර මහෙස්ත්‍රාත් අධිකරණයට ඉදිරිපත් කිරීමෙන් අනතුරුව බරපතළ ලිංගික අපයෝජන චෝදනාව යටතේ රක්ෂිත බන්ධනාගාරගත කරනු ලැබුවා.
මෙරට පාසල් අශ්‍රිතව සිදුවන කවර හෝ ළමා අපයෝජන සිදුවීම් පිළිබඳව පැමිණිලි හා තොරතුරු කඩිනමින් ජාතික ළමා ආරක්ෂක අධිකාරියේ 1929 ශ්‍රී ලංකා ළමා උපකාරක දුරකථන සේවයට දැනුම් දෙන ලෙසද ජාතික ළමා ආරක්ෂක අධිකාරිය වැඩිදුරටත් දන්වා සිටිනවා.
