යහපත් කල් ක්‍රියාවෙන් සිටින සහ එය ඔප්පු කර ඇති සිරකරුවන්ට සතියක කාලයක් පවුලේ සාමාජිකයන් හා ගතකර පැමිණීමට අවස්ථාව ලබාදෙන බව අධිකරණ අමාත්‍ය අලි සබ්රි මහතා පවසනවා.
අමාත්‍යවරයා පෙන්වා දෙන්නේ යහපත් කල්ක්‍රියාවක් ඇති සිරකරුවන්ට මේ අයුරින් නිවාඩුවක් ලබාදීම සඳහා බන්ධනාගාර පනතට අනුව අමාත්‍යවරයාට බලය හිමි බවයි.
බන්ධනාගාර දෙපාර්තමේන්තුවේ ජ්‍යෙෂ්ඨ නිලධාරීන් සමග වැලිකඩ බන්ධනාගාරයේදී ඊයේ (23) පැවැති සාකච්ඡාවකින් අනතුරුව මාධ්‍යට අදහස් දක්වමින් අමාත්‍යවරයා මෙම අදහස් පලකළා.
අමාත්‍යවරයා එහිදී වැඩිදුරටත් සඳහන් කළේ බන්ධනාගාරයේ කටයුතු වඩා වේගවත්ව, ක්‍රමවත්ව හා පිළිවෙළකට, කිසිදු බාධාවකින් තොරව ඉදිරියට කරගෙන යාම සඳහා අවශ්‍ය ක්‍රියාමාර්ග පිළිබඳව තමන් බන්ධනාගාර නිලධාරීන් හට උපදෙස් ලබාදුන් බවයි.
